Mahuma Memorial First Division Cricket Tournament khelh mek fourth round game thumnaah Chanmarians Cricket Club chuan an khingpui Gorkha Cricket Club chu run 92-a hnehin an ke lehlamin semifinal an rap a tih theih ta.

Chhinga Veng Cricket Club nen an inkhelh tuma result awm theih loh avanga point khat hlawh chhuak Chanmarians hian tun tournament-ah hneh loh an la tawng lo.

Toss-a vannei zawk Chanmarians-in vuak hmasak an thlang a, an thlang fuh thawkhatah a ngaih theih. An opening batsman pahnih Lalhmangaiha (run 26) leh Lalhruaizela (run 44)-te'n bul an tan tha a, state pawn atanga an lak luh an allrounder Debojyoti Jun chuan run 57 rawn thawh ve bawkin over 40-ah Chanmarians hian run 216 siamin wicket 10 an hloh. Gorkha CC tan an allrounder pahnih Indra Chhetri (wicket 3) leh Vishnu Bhandari (wicket 2)-te chuan an vawm tha ber.

Over 40-a run 217 siam tura um hi Suaka Cricket Ground pitch-ah thil awlsam a ni ngai lo. Gorkha CC lamin muangchang miah loin an khelh a ngai dawn tih an hria. Mahse hma takah an opening batsman an hloh a, target sang an um avangin an insiam rem hleithei lo. Run tam an siam hmain Gorkha batsman-te an out zel a, Chanmarians tan an bowler Lalhmingliana'n a vawm \ha ber a, over 6.5 a vawmah run 15 chiah pein wickt 4 a la a ni.