14 Nov 2017 07:11

Inkhel

Mizo Sports Website hmasa ber

​Chanmarians an la hrawl

Mizorama cricket inelna sang ber leh ngaihhlut ber Mahuma Memorial First Division League inkhelah Chanmarians Cricket Club chuan an khingpui Zarkawt Lords Cricket Club chu Suaka Cricket Ground-ah wicket sarih (7)-in an hneh.

Cricket first division league round 1 game thumnaah hian toss-a vannei Lords-in bat hmasak an thlang. Run 12 an siamin an opening batsman pahnihte an hloh avangin Lords dinhmun a hniam hman hle a, mahse state pawn atanga an lak luh Zahir Uddin chuan an dinhmun a rawn siam tha chho leh. Zahir hian ball 117 a hmachhawnah run 98 vaw chhuakin tun season-a century siam hmasaber dinhmun a luah teuh hle a, run hnih chiahin a pha lo. Zahir-a thlawp hian G. Lalbiakvela (run 17) leh Partha (run18)-te'n theihtawp chhuah mahse an din rei pui hleithei lo. Chanmarians bowler zinga vawm tha fal ti a sawi tur an awm lo a, an bowler-te zawng zawngin an hna tlin taka thawkin an tih tur dik tak an ti tlang a tih theih. Over 38.5-ah Lords batsman-te an out fai vek a, mahse run 172 lai an ngah hman.

Bul an tan that loh ngaihtuahin Lords an in siamtha chho viau a, hma taka an allout mai tura ngaih an nih lai run 172 lai an tlin chho leh thei hi an middle order batsman-te thawh rah liau liau a ni. Hetihlai hian Chanmarians-te an captain K. Lalremruata damloh vanga a khelh theih loh a lang deuh niin a lang a, an captain awm se Lords hian heti zah zah an kai chho leh thei lo mai thei(?)

Batting lineup nei tha Chanmarians bat hun a thleng a, Lords-in pawi a thlen thui hmain an mamawh wicket an la. Chanmarians-in run 23 chiah an siam tihin an opening batsman an hloh a, mahse an innghna Lalhmangaiha a che thaa a tawp thlenga damin ball 71 a hmachhawnah run 80 lai a vaw chhuak. State pawn atanga an chah luh allrounder Debojyoti Jun Chanda chuan run 32 thawh vein target um tham taka ngaih chu over 24.2-ah wicket thum chiah hlohin an thleng thei a ni.