Chanmari West FC hnehin top 4-ah Mizoram Police FC an awm

02nd November 2017, 12:11AM

Mizoram Police FC chuan MPL round 12-ah 4-2 in Chanmari West FC an hneh leh a, BS-a hnuaiah Mizoram Police an kaltluang zel, November ni 1-a Chanmari West FC an hneh tum hian F Lalrinpuia (Valpuia) chu man of the match-a thlan a ni nghe nghe.

Round 6-ah khan team pahnihte hi an lo inhmachhawn tawh a, Mizoram Police FC hian 2-1 in hnehna an chang, an intawn vawi hnihnaah pawh Police an chungnung leh ta a ni.

Chanmari West FC 3-4 Mizoram Police FC

(Jacob Lalrawngbawla 5', 43', Vanlalthlamuana 84') (Lalmawizuala OG 12', V Laltanpuia 59', F Lalrinpuia 62', Lalfakzuala 89')

MoM: F Lalrinpuia Mizoram Police FC

Chanmari West FC hian coach thar H Lalnunzira hnuaiah Ramhlun North FC leh Mizoram Police FC an hneh lo, tun season MPL-ah vawi thum hnehna chang tawhin vawi sarih an tlawm tawh a, vawi 2 draw nei tawhin point 11 an nei mek.

Mizoram Police FC hian coach thar Lalbiaksanga Colney (Bsa) hnuaiah hneh loh nei lovin an kal tluang, an match hnuhnung berah erawh Chanmari FC lakah an tlawm hlauh, point thum uihawm tak hloh mahse Chanmari West FC lakah erawh hnehna an chang leh a, game 12 atangin point 17 an nei mek a, a sang pali zingah an tel mek a ni.

Inkhelh tan a ni a, Chanmari West FC chuan goal an khung nghal, tan atanga minute 5-na lekah Jacob Lalrawngbawla chuan Chanmari West FC hma a hruaipui. Mizoram Police FC chuan nawr let nghalin minute 12-naah mual veilam atanga Hlutea ball vawrh luh tha zet chu defender Mawizuala chuan an lamah a dang per lut hlauh a, Mizoram Police FC chuan an siphurh an rul nghal.

Mizoram Police FC hian goal thun belhna hun tha neiin Valpuia shot tha zet chu Chanmari West FC keeper Vanlalhriata chuan mawi takin a lo dan sak. Chanmari West FC chuan goal thun belhna hun tha nei ve bawkin Jacob-a freekick tha zet chu Police goalkeeper Andrew-a chuan a lo dan sak ve a. First half tawp dawn minute hnih a la awm tihin Jocob-a chuan box pawn chiah atangin an goal hnihna a khung, half time a nih chuan 2-1 in Chanmari West FC chuan hma an hruai.

Second half-ah Mizoram Police FC an insiamrem, Ruatpuia leh Sangbera luh tir an ni a, danglamna thlen nghalin minute 59-naah V. Laltanpuia chuan an siphurh a rul. Minute 62-ah Valpuia chuan freekick atangin an goal thumna a khung zui nghal zat bawk.

Mizoram Police FC chuan si khatin hma hruai mahse an goal humhim an tum mai lo, an nawr chhunzawm zel a, Biaktea leh Tri-a chuan goal an khung teuh hle. Fakzuala pawhin chance tha tak tak vawi hnih a nei bawk.

Chanmari West FC chuan an siphurh sut ngei tumin Thlamuana, Lianzama leh Calvin-a an luhtir, an nawr na hle, hun tawp dawn minute 6 a la awm tihin Thlamuana chuan Chanmari West FC siphurh a rul ta nge nge, 3-3 a ni ta. Mizoram Police FC chuan draw an duhtawk lo, chak hram tumin an nawr a, hun tawp dawn tak takah Fakzuala chuan chakna goal khungin 4-3 in Mizoram Police FC chuan hnehna an chang ta a ni.

November ni 10, Zirtawpni tlai dar 3:00-ah Mizoram Police FC hian Dinthar FC an hmachhawn leh ang a, chumi zan dar 7:30-ah Chanmari West FC hian Aizawl FC an hmachhawn ang.

Reporter : PC Lala

Copyright © inkhel.com 2024. All rights reserved.