March ni 30, Ningani zan khan Hawla Indoor Stadium Republic Vengthlangah Mizoram Super League Season 3 khelh chhun zawm leh a ni a, Chanmari Hollow BBSP chuan 68-67 in Mission Veng Vikings an hneh.

(adsbygoogle = window.adsbygoogle || []).push({});

Kai thar Chanmari Hollow hian an match hmasa berah champion lai Khatla TBL an hneh teuh hle a, 69-67 in chak lo mahse, Mission Veng Vikings lakah erawh an thiam zia an lantir a, hnehna an chang ta a ni. Guard Lalhmachhuana, Vanlalthazuala leh center Lalruatfela te chuan an thawh hlawk hle, hetih lai hian an state pawn player Mohit Bhadu leh Jag Deep Bains Singh-te chu an chakna hnar a ni.

Mission Veng Vikings hian an match hmasa berah Zarkawt Serpents 67-66 in hneh mahse an chak danah Zarkawt Serpents ten complain an theh lut a, MSL Board leh Technical Committee chuan ngun taka an ngaihtuah hnuah inkhel tha leh turin thutlukna an siam a ni.

Mission Veng Vikings hian India player tha Rikin Pethani be fel tawh mahse an la chhawr thei lo a, Mizo hlangin an khel thung. Lalrina Renthlei, Michael F, Lalruatkima leh Moses-a te an khel tha hle, Lalrina phei chuan a dunk nghe nghe a, Mizo zingah MSL-a dunk hmasa ber a ni nghe nghe.

First quarter-ah Chanmari Hollow hian bul an tan tha zawk a, hmahruaitu zawkah an tang chho ngar ngar, Jag Deep Bains Singh leh Vanlalthazuala chuan point 7 score an nei ve ve a, guard Lalhmachhuana leh forward R Lalnunpuia ten an thlawp that tawk loh an tuar deuh. Mission Veng Vikings tan Lalrina Renthlei chuan point 7 score-in, Lalruatliana Sailo chuan point 5-a score ve thung a, Michael F leh K Lalrinchhana ten an rawn thlawp that bawk a vangin first quarter a zawh chuan 17-17 a ni ta a ni.

Second quarter-ah Mission Veng Vikings chu hmahruaitu zawk a ni a, Chanmari Hollow tan Mohit Bhadu rawn lut mahse danglamna a thlen lem lo. Mission Veng Vikings tan Lalrina Renthlei chuan point 7 a rawn khung leh a, second quarter-ah hian Lalrina hian a dunk nghe nghe a ni. Second quarter a zawh meuh chuan Mission Veng Vikings chuan 32-23 a hmahruaiin chawlh lawk an hmang.

Third quarter-ah Mission Veng Vikings chuan hmahruai zelin, Moses-a, Lalruatkima Sailo te langsar mahse Michael F leh K Lalrinchhana ten an tlawp tha tawk lo deuh. Chanmari Hollow tan Jag Deep Bains Singh leh Mohit Bandu an langsar a, Lalruatfela, Vanlalthazuala leh Lalhmachhuana te an thawh hlawk ve bawk mahse, third quarter a zawh chuan Mission Veng Vikings chuan 45-41 in hma an la hruai.

Quarter hnuhnung berah Mission Veng Vikings chu hmahruaitu zawk an la ni chho zel a, Lalrina Renthlei langsar mahse midangin an thlawp that tawk loh an tuar chho ta. Chanmari Hollow tan Mohit Bandu leh Deep Bains Singh bakah Lalhmachhuana te an an thawh hlawk chho tan a, huntawp nan minute 2 ala awmin Mission Veng Vikings tan Moses-a chuan point a rawn score leh a, Vikings chuan 67-65 in hma an hruai.

Hun a tawp tep, chak zawk tur hriat a ni lo, Hollow tan Mohit Bhadu chuan point score ve leh in, 67-67 a ni ta. Huntawp nan 12 sec a la awmin Hollow tan Jag Deep Bains Singh chuan free throw a hlawh chhuah a hmang tangkai ta, Chanmari Hollow chuan 68-67 in hnehna an chang ta a ni.

Mimal che tha te:-

Chanmari Hollow:-

Jag Deep Bains Singh:- score 19, Rebound 9, Assists 6, Steal 2.

Mohit Bhadu:- Score 14, Rebound 3, Assists 3.

Lalhmachhuana:- Score 13, 3points 2, Rebound 11, Assists 2, Block 1, Steal 1.

Vanlalthazuala:- Score 13, 3points 2, Rebound 3, Assists 1, Steal 3.

Mission Veng Vikings:-

Lalrina Renthlei:- Score 24, 3points 3, Rebound 5, Assists 3.

Lalruatkima Sailo:- Score 15, Rebound 5, Steal 2.

Moses Zoremmawia:- Score 9, 3points 1, Rebound 5, Assists 1, Block 5, Steal 2.

Michawl F Lalawmpuia:- Score 8, 3points 2,Rebound 7, Assists 3, Steal 1.

(adsbygoogle = window.adsbygoogle || []).push({});