Match thum an chak loh zawn hnuah October ni 27, Zirtawpni zan khan Mizoram Premier League Season 6 Phase 2 Round 11 na match hnuhnung berah Chanmari FC chuan 2-1 in Mizoram Police FC an hneh.
(adsbygoogle = window.adsbygoogle || []).push({});
Phase 1 Round 3-ah Chanmari FC hian 4-1 in Mizoram Police FC hi an hneh tawh a, an intawn vawi hnihnaah hnehna an chang nawn leh ta a ni. Chanmari FC tan MC Malsawmzuala leh Vanlalbiaa Chhangte chuan goal khat ve ve an khung a, Mizoram Police FC tan F Zosangliana chuan goal khat a khung ve bawk. Inkhel hmuh nawm takah MC Malsawmzuala Chanmari FC chu Man of the match-ah thlan a ni.
Mizoram Police FC 1-2 Chanmari FC
(F Zosangliana 18') (MC Malsawmzuala 74', Vanlalbiaa Chhangte 78')
Mizoram Police FC hian coach thar Lalbiaksanga Colney (Bsa) hnuaiah hneh loh an tawn loh hnuah Chanmari FC an hneh lo ve ta a ni. Khelh tawhah point 14 neiin a sang pali zingah an tel phak tawh lo.
Chanmari FC hian Pune City atangin Gani Ahmmed an hawh bakah Nigerian defender Emmanuel an la lut a, khelmualah an tlangnel tan tawh. Coach Vanlalthlanga hnuaiah vawi li hnehna chang tawhin vawi thum draw neiin vawi li an tlawm thung a, point 15 neiin semifinal khel turin beiseina an nei thar leh ta a ni.
Inkhel tan a ni a, Mizoram Police FC chuan inkhel thunnun zawkin Minute 18-ah Lalrinchhana freekick pet tha zet chu box chhunga awm Zosangliana chuan tauh lutin an hmahruaina a thun. Police chuan nawr chhunzawmin Biaktea chuan goal ban a pet per hlauh a, Vanlalhruaia leh Lalfakzuala chuan goal thunna hun tha an hlah ve ve bawk.
Chanmari FC chuan nawr letin Pune City a tang a an hawh Gani Ahmmed chuan vawi hnih goal thunna hun tha a hlah a, Muanzova goal shoot tha zet chu keeper VK Malsawma chuan a dan sak hnuah Thasiama chuan an siphurh sutna hun tha a hlah ve bawk.
Second half-ah Chanmari FC insiam thain Mabiaa, MC Malsawmzuala leh Rochhingpuia lutin danglaman an rawn thlen nghal a, minute 74-ah bench a tang a lut MC Malsawmzuala chuan freekick atangin an siphurh sutna goal ropui a khung. Minute 4 aral leh hmain MC Malsawmzuala chuan goal kham a pet per a, ball let leh chu Mabiaa chuan goal-ah chantirin an goal hnihna a khung zui ta a ni.
Huntawp dawnah Mizoram Police FC chuan an siphurh sutna hun tha neiin Biaktea chuan a hun tha neih a hlah a, Added time-ah F Lalrinpuia (Valpuia) penalty hlawhchhuah chu Sangbera chuan petin goal zawnah a pet lo thung.
November ni 2, Ningani tlai dar 3:00-ah Chanmari FC hian Bethlehem Vengthlang FC an hmachhawn ang a, November ni 3, Zirtawpni tai dar 3:00-ah Mizoram Police FC hian Chanmari West FC an hmachhawn thung ang.
(adsbygoogle = window.adsbygoogle || []).push({});