​Chanmari FC-in Bethlehem Vengthlang FC hnehin an dinhmun an sawh nghet

02nd November 2017, 12:11AM

November ni 1, Nilaini khan Mizoram Premier League Season 6 Round 12 na match hmasa ber Chanmari FC leh Bethlehem Vengthlang FC ten an khel a, Chanmari FC chuan sithum faiin Bethlehem Vengthlang FC an hneh a, Chanmari FC winger Vanlalbiaa Chhangte chu Man of the match-ah thlan a ni.

Chanmari FC tan Malsawmdawngzela chuan an lamah a pet luh a, Vanlalbiaa leh B Zoramthara chuan goal khat ve ve an khung. Round 6-ah khan team pahnih te hi goal awm loin an inhneh tawk tawh a, an intawn vawi hnihnaah erawh Chanmari FC an chungnung ta zawk a ni.

Chanmari FC 3-0 Bethlehem Vengthlang FC

(Malsawmdawngzela 28' OG, Vanlalbiaa 47', B Zoramthara 49')

Coach Vanlalthlanga hnuaiah Chanmari FC hian tun season MPL-ah hnehna vawi nga an chang tawh a, vawi thun draw neiin vawi li an tlawm a, point 18 neiin table-ah pathumna an hauh mek a ni.

Bethlehem Vengthlang FC hi a zawn a match thum an chak loh hnuin coach Chawngthansanga chuan banna a theh lut a, coach thlakna tur an la hmuh loh avangin assistant coach Benjamin Lalhriatpuia chuan enkawlin a match hmasa berah hnehna chang nghal mahse Chanmari FC lakah an mualpho zui nghal. Tun season MPL-ah vawt li hnehna chang tawhin vawi thum draw an nei a, vawi nga tlawm tawhin point 15 nei ve mek a ni.

A tir atangin an innawr tawn nghal zak zak hnuah Chanmari FC chuan goal thunna hun tha nei hmasa zawkin Pune City atanga an hawh Gani Ahmmed shot leh C Muana shot chu Bethlehem Vengthlang FC goalkeeper Ruatpuia chuan a dan sak.

Chanmari FC chuan nawr chhunzawmin minute 28-ah B.Thara freekick chu Mabiaa chuan tauh pialin Bethlehem Vengthlang FC defender Malsawmdawngzela chuan an lamah a dang goal hlauh. Si khat faiin Chanmari FC chuan hma an hruai ta.

Bethlehem Vengthlang FC chuan an siphurh sutna hun tha an nei chhunzawm ve zat, Lalnunzama, Lalthazuala leh PC Zosanga te chuan hun tha tak nei mahse goal an khung thei lo. Hemi hnu hian Malsawma ball pek tha zet Rammawia shot chu Chanmari FC keeper Muanawma chuan a lo dan sak bawk.

Second half-ah Chanmari FC chuan bul an tan tha zawk a, minute 47-ah bench atanga lut MC Malsawmzual thawhrah sengin Mabiaa chuan an goal hnihna a khung, minute 2 a ral leh hmain Bethlehem Vengthlang FC defender David-a penalty chawi chu B.Thara chuan goal-ah chantirin an goal thumna a khung zui nghal zat bawk.

Bethlehem Vengthlang FC chuan an siphurh sut ngei tumin Lalmawizuala (Astea) leh Isaac-a an luh tir, an goal nawr a na sawt, hetih lai hian Chanmari FC chuan goal chhuah an tum bik si lo. Goal dang a luh belh tawh lova, si thum faiin Chanmari FC chuan hnehna an chang ta a ni.

November ni 9, Ningani tlai dar 3:00-ah Chanmari FC hian Ramhlun North FC an hmachhawn leh ang a, chumi zan dar 7:30-ah Bethlehem Vengthlang FC hian Chhinga Veng FC an hmachhawn ang.

Reporter : PC Lala

Copyright © inkhel.com 2024. All rights reserved.