​Chanmari FC-in Bethlehem Vengthlang FC an chelh ding

07th October 2016, 03:10AM

Chhangphut Field-ah Chanmari FC chuan MPL 5 hmahruaitu Bethlehem Vengthlang FC chu 4-1 laia hnehin hma an hruai fal zel tur Chanmari FC hian an chelh ding.

McDowell's No.1 Soda Mizoram Premier League chu a vawi khat nan Aizawl District pawnah khelh a ni a, MPL Round 7 Chhangphut Field, Champhaia khelh hi Champhai mipui chuan an hlut hle a, entu pawh an tam hle nghe nghe a ni.

First half-ah team hnihte hi 1-1 in an inhnehtawk a, second half-ah erawh Chanmari FC hian goal 3 an khung ta si a, 4-1 in an chak ta a ni. Khelh 7 atangin Chanmari FC chuan 14 points an nei a, hmahruaitu Bethlehem Vengthlang FC chu point 2 chiahin an thlau ta a ni. He match-ah hian Chanmari FC midfielder Fela Zote chu man of the match-a thlan a ni.

Chanmari FC 4-1 Bethlehem Vengthlang FC

(Fela Zote 36' , Lalrammawia 65', Malsawmfea 71' pen, Vanlalbiaa Chhangte 75' ) (PC Zosangliana 44' )

MoM:-Lalruatfela Zote (CFC)

Chanmari FC chuan inhliam vanga an chhawr theih loh Fela Zote an chhawr their tawh a, Boruak nuam tak hnuaiah inkhel tan a ni a, team pahnihte an innawr tawn zak zak a, chak zawk tur hriatthiam har khawp mai.

36 mins-ah Sawmfela ball pass tha zet chu box chunga lo awm Fela Zote chuan pet goal-in si khat faiin Chanmari FC chuan hma an hruai a, Chanmari FC hian hma an hruai rei lo, Bethlehem Vengthlang FC tan Zosangliana chuan a pet goal ve nghal zat a. Mual dinglam sir atanga Astea ball vawrh luh tha zet chu PC Zosanga chuan a push goal mawi hle a ni.

Second half-ah erawh Chanmari FC chuan goal thum lai khungin hneh loh la nei lo Bethlehem Vengthlang FC chu Chanmari FC lakah an tlawm ta a. Set piece atangin Chanmari FC chuan goal an khung a, Sawmfela free kick pet atangin Rammawia chuan an goal hnihna a khung a, minute 6 pawh a la ral hmain Muanzova chuan penalty a hlawhchhuak.

He penalty hi Malsawmfela chuan goal-ah a chantir leh a. Mabiaa shot chu Mala chuan a zuan phak lo hlauh mai, Chanmari FC chuan an goal 4-na an khung a, 4-1 laiin hnehna an chang ta a ni. He match-ah hian goal khat chu offside avangin chhiar a ni lova, second half tan tir lama PC Zosangliana pet goal chu offside avangin chhiar a ni lo hlauh a ni.

Copyright © inkhel.com 2024. All rights reserved.