1st leg-ah 1-1 in an inhnehtawk, November ni 30, 2017 (Ningani) zan khan McDowell's No1 Soda Mizoram Premier League season 6 semi final 2nd leg chu AR Lammualah khelh a ni a, MPL6 league-a a chungbera awm Chhinga Veng FC chuan 3-1 in Champion lai Chanmari FC an hneh a, aggregate chuan 4-2 a ni a, Chhinga Veng FC chuan final lutin Aizawl FC leh Mizoram Police FC chak zawk zawk final-ah an hmachhawn dawn a ni.
First half-ah R. Malsawmtluanga goal leh MC Malsawmzuala goal hmangin 1-1 in an inhnehtawk. Second half hun tawp dawn minute 5 a la awm tihin Chhinga Veng FC chuan K. Lalthlahlova leh Malsawmfela hmangin goal hnih an khung leh a, 3-1 in hnehna an chang ta a ni. He match-a man of the match chu Chhinga Veng FC midfielder R. Malsawmtluanga a ni.
Chanmari FC 1-3 Chhinga Veng FC
(MC Malsawmzuala 36') (R. Malsawmtluanga 19', K. Lalthlahlova 85', Malsawmfela 89' pen)
(2-4 agg)
Chanmari FC XI : Muanawma, Zohera, C.Muana, Rosanga, Thomas, Chhinga, Faka, Thasiama, Mabia-a, B.Thara, MCA
Chhinga Veng FC XI : T.Mawia, Hmingtea, K.Patea, Rinchhana, Dinliana, RCH-a, Dingngheta, MS-a, Apuia, Lawma, Mapuia
Chhinga Veng FC hi MPL6 league leader an ni a, 2nd leg-ah pawh hian khel tha zawk an ni. 1st half-ah Chhinga Veng FC hian chance an nei nual a, chutih rualin Chanmari FC pawhin chance hlauhawm tak tak an nei ve bawk.
Goal hmasa ber hi free kick atanga lut a ni a, 25 yards atangin R. Malsawmtluanga chuan mawi takin Chhinga Veng FC tan free kick a pet goal. First half tawp dawn minute 9 a la awm tihin MC Malzawmzuala chuan mawi takin ball a dawng, a turn-pui nghal a, a ke veilam chuan box pawn atangin a shot, Chhinga Veng FC goal top corner-ah a thlawk lut mawi hle, T. Mawia tan dan ngaihna a awm lo.
Second half-ah squad nei chhah zawk Chhinga Veng FC chuan penalty shootout hmanga chak zawk an zawn mai an hlauh avangin an hmatawng an rawn thuam tha a, Dawngtea leh Malsawmfela te an la rawn dahlut thei tlat mai le. Hei hian awmzia a rawn nei chiang hle. Hun tawp dawn minute 5 a la awm tihin MS-a chuan ball tha tak a vawrh lut, Dawngtea chuan hnai tak atangin a tauh a, Chanmari FC goalkeeper Muanawma chuan a lo dang tha kher mai.
Hemi hnu lawk hian Chhinga Veng FC chuan goal an khung ta nge nge. Mual veilam sir atanga Dampuia cross tha zet chu box chhung pen 7 vel atangin K. Lalthlahlova chuan a tauh, Muanawma tan dan ngaihna a awm ta lo, Chhinga Veng FC chuan hma an hruai leh ta. Rei an khel hman lo, 88 mins-ah Zohera chuan box chhungah Malsawmfela a titlu, referee chuan penalty a ham a, he penalty hi Malsawmfela chuan goal-ah chantirin 3-1 in hnehna an chang a, aggregate chuan 4-2 a ni ta a ni.
First half a hmuhnawm hle a, goal mouth action pawh a tam kher mai. Chanmari FC hian Vanlalbiaa hmangin goal an khung hmasa teuh hle, goal ruakah Mabiaa chuan a shot, a goal ngei tawh dawn nia a lan laiin Rinchhana'n goal line atangin a lo clear. Chhinga ball vawrh tha tak Thasiama shot T.Mawia lo dan pawh a tha kher mai.
Chhinga Veng FC pawhin chance an nei hnem hle bawk a, R. Malsawmtluanga cross Khawpuimawia tauh chuan Chanmari FC goal ban a per a, Vanlallawma ball hloh B.Thara'n box chhunga a tlanluhpui chu hnai set sawt atangin a pet over bawk. First half tawp dawn tepah Apuia'n box pawn atangin Chanmari FC goal cross bar a pet per dawp nghe nghe a ni.
Second half tir lamah goal chance an insiam hleithei lo ve ve a, Chhinga Veng FC-in squad an neih chhah an chhawr tangkai a, hun tawp dawn tak takah an that zawk zia an lantir ta a ni. Chanmari FC hian final luhna chance tha tak chu an nei chiang mai, hetih lai hian ball an hloh nasat mai bakah pass sual an ngah hle bawk a, Chhinga Veng FC erawh tun MPL-a squad nei tha ber an nih loh pawhin a dawttu tal an ni ngei anga, league hmahruaitu an nih angin phu takin final-ah an inpet kai ta a ni.
December ni 4, 2017 (Thawhtanni) zan hian semi final pakhat zawk khelh a ni leh dawn a, Aizawl FC leh Mizoram Police FC te chu 1st leg-ah 2-2 in an inhnehtawk a, second leg-ah Chhinga Veng FC hmachhawn tur a hriat tawh dawn a ni. Final hi December ni 8 zanah khelh a ni ang.
Photograper : PC Lala