Premier League hnuaichiah a awm Championship season chu khar fel a ni lek lek tawh a, club tam zawkin game khelh tur an nei tawh lo va Huddersfield leh Blackpool inkhel tur chiah a awm tawh.

Tun season-a Championship team-te inum hi a ngaihnawm ang reng a, pakhatna dinhmun luah rei thei an awm lo va Bournemouth leh Watford-in a tawp lamah an inchuh deuh ta thung.

Inrinni thleng kha chuan Watfrod hian hma an hruai a, mahse Sheffield Wednesday nen an in draw a anmahni hnaih bertu Bournemouth-in Charlton an hneh thung a point khata lehpelin Premier League khel tura tling hmasa Watford hi pahnihna an ni ta daih.

Charlton an hnehna inkhelah hian Bournemouth tan Matt Ritchie chuan goal hnih a khung a Harry Arter pawhin goal khat a khung ve bawk.

Point thuma hmahruai rengtu Watford hian Sheffield Wednesday an mikhual a, minute 25-naah Matej Vydra goal hmangin hma an hruai. An chak mai dawn emaw tih tawh hnuah goal an chhuah a, minute 90-naah Sheffield Wednesday tan Atdhe Nuhiu chuan an si phurh a sut a Watford tan goal khung lehna hun a awm tawh lo.

Champion ni ta Bournemouth hi kum 2008 khan sum tlakchham vangin tihtawp a ni hman tep a, Football League atangin an chhuak lek lek hman.

Mahse Eddie Howe enkawlna hnuaiah hma an sawn a, division pathum atanga hmasawn chho zelin tunah Premier League khel turin an tling ta hial a ni.

Cherries hian game 46 an khelh atangin point 90 an hlawhchhuak thei a, pahnihna a awm Watford hian point 89 an nei thung. Pakhatna leh pahnihna hian Premier League an khel nghal thei dawn a, pathumna atanga parukna chinin Premier League-a khelh theihna hmunruak pakhat la awm play-off hmangin an inchuh ang.

Pathumnaah hian Norwich City (86 points) an awm a, palinaah Middlesbrough (85 points) an awm ve bawk a Brendtford (78 points)-in an dawt. Paruknaah point 78 tho neiin Ipswich an awm bawk a Wembley stadium-ah play-off hi an khel ang.

Blackpool, Wigan Athletic leh Milwall-te'n Championship table-ah hian hnu an khar a, divison hniam zawkah an tla thla.