Suaka Memorial Cricket Ground, Sihhmui a khelh mek Mahuma Memorial Cricket Tournament-ah Champion lai Kulikawn CC leh kai thar Luangmual CC te November ni 25, 2016 khan an inhmachhawn a. Kulikawn hian wicket 10 in hnehna an chang a ni.

Toss-a vannei zawk Luangmual CC chuan vuak hmasak an thlang a, Opener Zaithanmawia chu ball 7 lek a hmachhawn hman tihin a duck out nghal! Captain G. Lalbiakvela (10 runs) leh Raj Kumar Thakur (16 runs) ten tlem rawn belh mahse wicket an hum rei thei lo.

Lalrinchhana (18 runs) chuan theihtawp rawn chhuah mahse Kulikawn captain Michael Lalremkima an ngam lo hle a, ani hian over 5.3-ah run 13 chauh pein wicket 4 a la a; Luangmual lam hian over 22.3-ah run 69 chauh siamin an out vek a ni.

Round 1 leh 2 a chak tawh lo champion lai Kulikawn lamin chak ngei ngei an mamawh a ni tih hriain bowling lama che tha Michael Lalremkima leh President's Cup Player of the Tournament Lalrinsanga a tirah an thawh chhuak a, Luangmual lam tan insiamremna hun engmah siam hman lovin wicket khat mah hloh lovin over 9-naah an target (70 runs) hi an um pha ta hem mai!

Michael Lalremkima hian ball 37 a hmachhawn atangin run 54 a vaw chhuak a, Lalrinsanga hian run 10 a siam ve bawk a, Champion lai Kulikawn CC ten Luangmual CC te hi wicket 10 a hnehin Comeback Ropui an rawn lan tir a ni.

26.11.2016 (9:15 AM)

Round 3 Last Match

Ramhlun Venglai vs Chhinga Veng CC