​Champion lai Khatla TBL-in Serpents sawpin an ze ngai an chhuah leh tan

07th April 2017, 06:04AM

Khatla TBL hian an match hmasa berah Chanmari Hollow hneh, hemi hnu hian Zarkawt BCA lakah an tlawm chiang hle. An state pawn player thar an thawhchhuahpui, April ni 6, Ningani zan khan Mizoram Super League champion lai Khatla TBL chuan Zarkawt Serpent chu 80-64 in an sawp. TBL hian champion turin theihna an nei tih an pho lang leh ta a ni.

Khatla TBL hian MSL 2-a an player pawimawh Vishesh Bhriguvanshi bakah American player Chris Solomon leh Garry Gill te an chhawr thei a, an chakna hnar an ni a, Chris Solomon leh Garry Gill dunk chu mipui lamin an lawm leh hle bawk. Tin, sawi hmaih phal loh Eddie Zaithanmawia, Nelson Lalrohlua leh Simon Lalremruata te an thawh hlawk hle a, coach cum player H Laldinsanga (Mapuia) che a hmuhnawm hle bawk.

Zarkawt Serpents hian match hnih khel tawhin hneh an la nei lo thung a, Sahil Sharma leh Kanipi Shiv Kumar te nei ve bawk mahse beisei an pha lo thung. Mizo player Lalthankhuma, Lalsangkima Ralte leh H Lalthangliana te thawh hlawk viau mahse Khatla TBL player Vishesh Bhriguvanshi, American player Chris Solomon leh Garry Gill te an dang zo lo a ni.

TBL hian State pawn player an nei tawh bawka an phur hle a, bul an tan tha a, hmahruiatu zawkah an tang chho ngar ngar, Garry Gill chuan bul tanin, minute 1 hnuah Chris Solomon a rawn inlan ve leh a, 1st quarter-ah an pahnih point belh khawm hi 15 lai a ni a, Simon Lalremruata chuan point 6 a score ve bawk. Zarkawt Serpent tan Kanipi Shiv Kumar chuan bultan ve bawk mahse, beisei a pha lo.

Second quarter-ah pawh TBL chuan hmahruai zelin Vishesh Bhriguvanshi leh Eddie Zaithanmawia an thawh hlawk hle a, an pahnih point belh khawm hi 16 lai a ni. Zarkawt Serpents tan Sahil Sharma chu a rawn khel zia hle a, mahse team combination a fuh loh laklawh avangin an hnufum ta hle, half time a nih meuh chuan 45-24 laiin TBL chuan hma an hruai tawh.

Third quarter-ah TBL chu hmahruaitu an ni zel a, Chris Solomon rawn inlan leh in, a rawn dunk-a point 7 a rawn score bawk a. R Lalruattluanga a thawh hlawk hle bawk. Zarkawt Serpents tan Lalsangkima thawh hlawk mahse, midangin an thlawp tha lo thung. Fourth quarter-ah Garry Gill chuan a dunk ve thung, point 8 a rawn hlawhchhuak bawk. Hun a tawp meuh chuan Khatla TBL chuan 80-64 zetin hnehna an chang ta a ni.

Khatla TBL tan Chris Solomon leh Garry Gill an dunk, an kheltha dun hle bawk, an langsar dun hle, TBL chakna hnar ni bawk mase, Eddie Zaithanmawia a thawh hlawk a, a che a hmuhnawm hle bawk. Eddie hian Point 10 score-in rebound vawi kua zet a la nghe nghe a ni.

Zarkawt Serpents tan Lalthankhuma thawh hlawk viau mahse, Sahil Sharma leh Kanipi Shiv Kumar ten beisei an pha lo a, an thawhhona that tawk loh an tuar a, turnover an ngah a, in siam that an mamawh tih a chiang.

Inkhel Reporter : PC Lala

Copyright © inkhel.com 2024. All rights reserved.