Written by VL Nghaka Renthlei

Vawiin tlai khan Champhai Tourist Lodge ah Football Club thar Champhai United FC chu Pu CC Lalchuangkima Project Director DRDA in a tlangzarh.

Football Club thar Champhai United FC tlangzarhna inkhawm Tourist Lodge-a neih hi Pu Lalthamawia Bawlchhim chuan a kaihruai a, Champhai United FC Team Coach tur Pu NL Thanga NIS chuan Club din anih dan leh an kalphung turte tarlangin, Champhai Bethel Pastor Bialtu Pastor Rev H Zathuama chuan Champhai United FC hi Pathian hnenah a hlan a ni.

Team Tlangzarhtu Pu CC Lalchuaangkima Project Dirrector DRDA chuan, "Champhai-in Football-ah hma kan sawn a tul a, Football hi eizawnna tlak ani" tia sawiin Football pawimawh zia in bul a tan. Eizawnna atana hmang thei tur khawpa thawk rim turin Players te chah in, tum ruhna leh thawhrimna tel lo chuan hlawhtlinna a hmuh theih loh thu a sawi bawk.

Football eizawnna atan hmang tur chuan inkhelh thiam mai tawk loin tawng thiam tel a tul thu a sawi bawk. He hunah hian Champhai United FC President leh a neitu ni bawk Pu Lalmuanpuia chuan thusawiin Champhai United FC hi changtlung taka kalpui a nih tur thu te, champhai naupang talent nei tha tak tak te haichhuah chu an tum ber a nih thu leh, Players pawh an zawn khawm mek thu a sawi a. MPL Play-Off khel tura hma an lak nghal thu te, Champhai mai ni lo, MPL leh I-League thlenga khel thei tura inbuatsaih an tum thu a sawi a. He hunah hian Pu C Hualrikhuma President CDFA leh Pu Lalnunmawia CDFA Adviser leh MFA Vice Pre. ni bawkten thu an sawi ve bawk.