​Chamberlain hmangin Arsenal-in Community Shield an chawi

03rd August 2015, 03:08AM

FA Cup champions Arsenal chuan si khat faiin Premier League champions Chelsea an hneh a, 2015 FA Community Shield an chawi ta. Wembley-a mipui 85,437 hmaah Chamberlain chuan goal awmchhun a khung a ni.

Goal awmchhun hi first half minute 24-a lut niin, mual veilam sir atanga Arsenal attacking chu Walcott hmangin dinglamah an insuan a, Walcott-a ball pek tha zet chu Chamberlain chuan box chhungah tlan luhpuiin, a ke veilam chuan top corner-ah a chhuih lut ta, Courtois tan tihngaihna a awm lo, he goal hi Arsenal chuan an chak pui ta a ni. Arsene Wenger hian Mourinho enkawl team hi vawi 14 a hmachhawn na a ni ta, tichuan tun tum hi a vawikhat hnehna zu ni a !

Arsenal 1-0 Chelsea

Chamberlain 24'

Arsenal : Cech, Bellerin, Mertesacker, Koscielny, Monreal, Ramsey, Coquelin, Cazorla, Oxlade-Chamberlain (Arteta - 77' ), Walcott (Giroud - 66' ), Özil (Gibbs - 82' )

Chelsea : Courtois, Ivanovic, Cahill, Terry (Moses - 82' ), Azpilicueta (Zouma - 69' ), Ramires (Oscar - 54' ), Matic, Willian, Fàbregas, Hazard, Remy (Falcao - 45' )

Arsenal hian a zawnin Community Shield an chawi ta a, nikum khan FA Cup champions Arsenal chuan 3-0 in Premier League Champions Man City kha an hneh a, kuminah FA Cup Champions Arsenal chuan si khat faiin Premier League Champions Chelsea an hneh leh ta a ni.

Arsenal khel a mawiin Chelsea hian an hneh lo hle, first half-ah Chelsea tan Ramires chuan chance vawi hnih a nei a, vawi khat chu box pawn atangin a thuai goal tep a, a hnu deuhah a tauh goal teuh hle bawk. Falcao chuan Remy a thlak a, second half pum khel mahse Arsenal defender te an inrem fuh hle a, Falcao-ah hmasawnna kan la hmu tam lo.

Falcao-a chance tha ber pawh Koscielny-a'n a lo dip ral hman a, ball a hloh nasa em em bawk. Chelsea hian Remy leh Falcao hmanga season bul tan chu an huphurh ve viau maithei, Costa hi hamstring hliam nei hrat a ni a, tun season-ah hian rei tak a inhliam leh phei chuan Chelsea tan chuan buaina nasa tak a ni ngei dawn niin a lang.

Arsenal hmatawng an che tha kan tih rualin Chelsea tlar hnung an khelh chhiat tum a ni kan ti thei bawk awm e. Bench atanga rawn lut Giroud chuan chance hlauhawm deuh deuh vawi thum a luh atanga reiloteah a nei nghal a, Cazorla chuan clear chance a thelh a, hun tawp dawn tak takah Gibbs chuan goal khung theihna chance tha tak a nei a, mahse Courtois chuan a lo dang hman hlauh a ni.

Cech chuan a team hlui Chelsea a dang hneh hle, Oscar-a free kick tha zetin a dang bawk. Arsenal defender Koscielny a khel tha rem rem hle, Hazard-a pet goal ngei tur nia lang pawh a tibuai hman bawk a ni. Inkhel pumpui thlirin Arsenal an chungnung zawk a, Arsenal hian clear chance vawi hnih an thelh nghe nghe, Chelsea erawhin clear chance sawi tur an nei lo, Oscar-a free kick kha goal hlauhawm an neih chhun kan ti thei awm e.

Ball possession-ah chuan Chelsea an chungnung zawk a, 57% an nei. Shot hrim hrim pawh Chelsea-in 14 an neih laiin Arsenal-in vawi 11 an nei a, mahse on target-ah erawh Arsenal-in vawi 5 an neih laiin Chelsea chuan vawi 2 chauh an nei a ni.

Copyright © inkhel.com 2024. All rights reserved.