Centre forward leh striker te hi team hmatawng ve ve an nih avangin hriatpawlhte pawh a awl thin hle, hmatawng ve ve ni mahse an khelh dan erawh a inang lo thin viau hle. Player thenkhat position nghet nei awm thin bawk mahse coach-ten an khelh tir dan formation hi an nihna a ni thin mah zawk a.

Centre forward emaw forward emaw kan tihte hi chu a hmalam postion hrang hrangah an khel thei tlangpuia, entirnan: Centre forward-te chu a tul chuan wing-ah te, striker hnung chiahahte leh attacking midfiel-ahte pawh an khel thei thin a ni. Centre forward hna chu goal khung tum ngawr ngawr lam ai mahin lehlam pawlte nawr lamah leh goal khungna hun remchang (chance) siam lamahte hna thawk tura duan an ni a, chuvang chuan goal khung lam ai chuan assist lam records an nei tha thin fo.

Wayne Rooney, Neymar, Benzema, Griezman-te hi tun generation-a centre forward tha nia an sawi thin an ni a, midang tam tak pawh sawi tur awm mahse entirnan anni hming hi kan han tarlang a ni. Thenkhat chuan Cristiano Ronaldo hi centre forward an ti thin, a hma chuan a ni thin alawm, tunah chuan Striker a ni tawh mah zawk a ni. Centre foward te hi striker-te aiin an pa lian lo zawk tlangpui thin bawk.

Centre foward game khelh dan kalphung chu kan hrethiam tawh ang, Striker lam ve thung han sawifiah leh ila. Anni hna ber chu goal thun ngawr ngawr hi a ni mai ti ila kan sawisual tamin a rinawn loh. Inkhel han en ila, striker-te hi chu anmahni lamin ball an chan chuan goal an khung theih nan penalty box chhungah an thiante ball pass beiseiin an lo tlanlut nghal chawt thin.

Lei hrulah an tha tur a nih rualin a kangah pawh defender lian tak takte aia tauh hmasa tur an nih avangin an taksa pawh a lian tlangpui bawk. An pa len leh san avang hian lehlam penalty box chhunga an lo awm hian an pawlte tan zawn hmuh an awlsam em em bawk thin a ni.

An ke emaw an lu emawin an thiante ball rawn pek leh vawrh luhte chu tih goal an lo tum thin. Striker-te hi centre forward-te angin an tlan tam lova, an tlan chhunte erawh fing taka an chhut a ngai thung. Zlatan Ibrahimovic, Harry Kane, Diego Costa leh Romelu Lukaku-te striker tam tak zingah kan hriatthiam theih nan entirnan hmang ila.

Mi thenkhat chuan football-a centre forward leh striker-te danglamna hi basketball-a power forward leh centre-te danglamna nen hian a inang te pawh an ti thin a ni. Centre forward hi chu 4-4-2 formation hman nasat hunlai atang khan a lo awm tawh a. 4-4-2 formation-a a hma lama awm pahnih zinga pakhat hi a tawlh hnung hret a, ball a lo va la thin a. Hemi hriatthiamna awlsam ber tur chu Rooney leh Van Persie-te Manchester United-a an khelh dun lai ang kha a ni.

Rooney kha CF a ni a Van Persie hnungah a tawlh hnung hret a, Van Persie kha Rooney-a hmaah striker angin a khel ta thin a nih kha. Mahse, tunlaiah hi chuan a tlangpuiin centre forward kan tihte kha an tawlh hnung lehzuala, attacking midfielder nia sawi an awlsam tawh zawk. Ozil pawh strker hnungah khel mahse attacking midfielder a ni ta zawk a ni. "False 9" kan tih hi an awm leh a, hei erawh kimchang takin post kan lo siam tawh a nih kha.

Centre forward hi chu formation hman dan azir leh manager ten an khelhtir dan (tactic/philosophy) azir a ni ber. Entirnan : 4-4-1-1 hi 4-4-2 atanga lo chhuak a ni a, hemiah hian centre forward hi striker hnungah dah sa a ni. Hemi kan hriatthiam nan entirna tha leh em em mai chu : Kum 2011-a Barcelona club-a David Villa leh Lionel Messi-te khelh thin dan ang kha a ni.

Pep Guardiola khan Messi kha Villa hnungah dahin; Messi kha midfield-ah a luh thlaktir a, midfield atangin a rawn che chhuak tan thin a nih kha. Aguero leh Rooney-te ang hi chu striker awmnaah awmsain a tul hun hunah centre foward angin an tawlh hnung leh mai thin.

Centre forward leh striker chhungah hian sawi tur tam tak a awma, vawikhata sawi sen vek theih a ni lo. Nidangahte pawh kan la khel chhunzawm zel turah ngai phawt mai ang.