LeBron James chuan a thiamzia a lantir leh a, a zarah Cleveland Cavaliers chuan NBA Eastern Conference finals-ah Boston Celtics chu 109-99 in an hneh a, beisei an la neih theih phah a ni.

An inkhelh hma hian Celtics chuan 3-2 in hma an hruai a, Cavaliers hi an chak loh chuan an tla thei tawh a. An chak leh tak hlauh avangin 3-3 in an inhnehtawk a, Boston-ah Game 7 an khel ang a, heta chak zawk zawk hian NBA Finals an lut ang.

A zawna NBA Finals vawi 4 luh tum mek Cavaliers hi an chak a nih ngat chuan he series-a away-a chak hmasa ber an ni ang a, post-season chhunga Boston home-a chak thei awm chhun an ni bawk ang.

James hian point 46 ngawt a thun a, rebound 11 lain assist 9 a nei bawk a. 2018 playoff chhungin point 40 hi vawi 7 a thun tling ta chiah a, Chicago Bulls player ropui Michael Jordan (1989) a nihrual chiah a, post-season chhunga point 40 thun tling hnem ber pahnihna an ni a. Record ding lai chu vawi 8 ngawt point 40 chin score tling thei Jerry West chuan 1965 khan a siam a ni.

First half chhungin LeBron hian a khel tluanchhuak a, hemi chhung hian point 25 a thun hman a. Kevin Love chu a lu hliam avangin a khelh chhunzawm thei lo a, hemi hnu hian Cleveland chuan hma an hruai chho zel a, second quarter-ah 34-18 in hma an hruai a.

LeBron James hian Karl Malone chu rebound lak hnem lamah a um pha chiah a, Malone hian playoff rebound 2,062 a la a, hei hi James hian a nihrual a, an pahnih hian parukna dinhmun an hauh chiah a ni.

George Hill chuan point 20 a score a, Jeff Green pawhin Cleveland tan hian point 14 a score bawk.

Terry Rozier chuan Celtics tan point 28 a thun a, Jaylen Brown pawhin point 27 a thun bawk a. Boston hian 2010 hnua a vawi khatna atan NBA Finals luh leh an tum hle a, an home-ah Game 7 an khel dawn bawk a, beiseina an nei sang hle a ni.

Anni pahnih inkhela chak zawk hian Golden State Warriors leh Houston Rockets inkhela chak zawk an hmachhawn dawn a, Western Conference finals-ah hian Rockets chuan 3-2 in hma an hruai mek a ni.