NBA Finals Game 2-a Stephen Curry chuan record thar a siam a, Golden State Warriors chu 122-103 a Cleveland Cavaliers laka chakpuiin, Warriors hian 2-0 in hma an hruai ta.

Kum 30-a upa Stephen Curry chuan three-pointer vawi 9 ngawt mai a thun a, a hmaa record ding lai, vawi 8 chu a khum a. 2010 khan Boston Celtics player Ray Allen chuan record hi a lo siam a Curry hma hian khum thei an awm lo. An inkhelh chhung hian Curry chuan point 33 a thun hman a ni.

Champion lai Warriors hi game hnih an chak leh a nih chuan kum li chhunga an title pathumna an la thei dawn a. Game 3 hi Cleveland-ah an khel leh ang.

Kevin Durant chuan point 26 a thun a, rebound 9 lain assist 7 a nei bawk a. Inhliam dam leh Klay Thompson pawhin point 20 a thun bawk.

Cavaliers tan Game 1-a point 51 ngawt thuntu LeBron James chuan point 29 a thun a, assist 13 neiin rebound 9 a la bawk a. Kevin Love pawhin point 22 a thun a ni.

Stephen Curry chuan, “Zan danglam leh duhawm tak a ni a, kan khelh zel turah pawh kan tana thil tha a rawn inher chhuah zel ka beisei,” a ti.

Cleveland thiampuipa James chuan, “Rilru hahdam lo deuha awm hi kan duh zawk emaw tih mai tur a ni a. Khelh leh hunah kan mualah khel dawn mah ila, ngaih tha taka awm thei kan ni lo,” a ti.

A sawi zelnaah, “Team hlauhawm tak mai an ni tih chu kan hre vek a, All-Star pali ngawt mai an awm a, chutiang han hmachhawn chu a hautak hle hi a ni ringawt,” a ti bawk.