Spain atanga Catalunya an independent a nih chuan La Liga-ah Barcelona an khel thei tawh dawn lo tih La Liga President Javier Tebas chuan a sawi chiang.
Karleh hian Catalunya-ah inthlan neih a ni dawn a, pro-independent party an chak a nih chuan Spain atanga Catalunya inlak hran chu an kalpui ngei dawn tih a chiang, nikum khan Britain atanga Scotland an inla hrang dawn nge dawn lo vote an lak ang khan Spain atanga Catalunya inlak hran duh leh duh lo vote pro-independent party hian an huaihawt dawn chiang niin a lang.
Chuti a nih chuan Catalunya mipui tam zawkte chuan Spain atanga inlak hran an duh dawn, Catalunya chu a independent thei dawn tlat niin a lang. Hemi chungchangah hian La Liga president a tawngchhuak a, "Spain then hran a nih chuan La Liga-ah pawh nghawng a nei ang. Mahse chu erawh thleng lo se kan duh hle a ni," tiin twitter-ah a ziak. Tebas hian Spain Sports Minister Miguel Cardenal thu a tawmpui hle.
FC Barcelona hi independent duh zinga tel leh campaign ang hialin media thenkhat chuan an tarlang, Barcelona president Josep Maria Bartomeu chuan Barcelona club chu politics-ah an inrawlh ve loh thu leh Sports chauh an buaipui thu a sawi chhuak nghe nghe a ni.
"Keini chuan Sports chauh kan sawi thin, karleh lawkah hian Catalunya-ah inthlanpui a awm dawn, hemi chungchangah hian keini Football club chu kan inrawlh ve lo a ni." tiin Josep Maria Bartomeu chuan Canal Plus a hrilh.
Catalunya hi an independent a nih ngat chuan Espanyol leh Barcelona te chuan La Liga an khel thei dawn lova. Catalunya chhung chauhva league an khel dawn a nih chuan top flight league khel tur team an chhe dawn hle. Chuvang chuan thenkhat chuan Barcelona leh Espanyol te chuan Ligue 1 lam an zawm mai an ring. Chutih laiin engmah chiang a la awm lova, han inthlang phawt se, he politics hian Europe Football chu a nghawng ngei dawn chiang a ni.
June ni 24, 2015 khan Catalunya leh Spain chungchang, an history atangin kan tarlang tawh a nih kha, chhiar nawn leh teh khai, tunlai an boruak i hriat laia an history i hre lo a nih chuan i bo lutuk dah ange. Hetah chhiar zawm rawh le.