Canadian GP pole position-ah Sebastian Vettel

10th June 2018, 06:06AM

Formula 1 Canadian Grand Prix chu Pathianniah an tlan leh dawn a, Ferrari driver Sebastian Vettel chuan pole position a chang a, a elpui Mercedes driver Lewis Hamilton chu palinaah a awm.

Vettel hi qualifying-ah hian a tlan tha hle mai a, Mercedes driver pakhat zawk Valtteri Bottas chu pahnihnaah awmin, Red Bull driver Max Verstappen chu pathumnaah a awm bawk a. Hamilton chu palinaah awmin, Ferrari driver pakhat zawk Kimi Raikkonen chu panganaah a awm bawk.

Kimi Raikkonen hi pathumnaa awm thei tur a ni chho char char a, mahse Q3 a tlan laiin kawi hnihnaah a tlan sual a, kawng sirah a tlan a, hun a paih phah teuh a, pangana atangin a tlan tan phah dawn a. Daniel Ricciardo chu paruknaah awmin, Raikkonen aia a tlan muanna hi a tlem tham hle.

Renault driver Nico Hulkenberg chu pasarihnaah a ding dawn a, Force India driver Esteban Ocon chu pariatnaah a awm ang a. Renault leh Force India bawk an indawt zui leh nghal a, Carlos Sainz Jr leh Sergio Perez te chu a indawtin an awm ang.

Q3 thleng pha lo zingah Haas driver Kevin Magnussen chu a chak ber a, Toro Rosso driver Brendon Hartley chu a hnung chiahah a awm dawn a. Sauber driver Charles Leclerc chu 13-naah a awm ang a, McLaren driver pahnih Fernando Alonso leh Stoffel Vandoorne te chu 14-na leh 15-naah an awm ang.

Ferrari leh Mercedes driver te chuan intlansiak hunah Pirelli tyre ultrasoft hmangin bul an tan dawn a, hemi hmang hian Q2 ah pawh an hun tha ber an neih theih phah a. Red Bull leh team dangte chuan hypersoft tyre an hmang phawt dawn a ni.

Qualifying result:
1 Sebastian Vettel (Ferrari)
2 Valtteri Bottas (Mercedes)
3 Max Verstappen (Red Bull/Renault)
4 Lewis Hamilton (Mercedes)
5 Kimi Raikkonen (Ferrari)
6 Daniel Ricciardo (Red Bull/Renault)
7 Nico Hulkenberg (Renault)
8 Esteban Ocon (Force India/Mercedes)
9 Carlos Sainz (Renault)
10 Sergio Perez (Force India/Mercedes)
11 Kevin Magnussen (Haas/Ferrari)
12 Brendon Hartley (Toro Rosso/Honda)
13 Charles Leclerc (Sauber/Ferrari)
14 Fernando Alonso (McLaren/Renault)
15 Stoffel Vandoorne (McLaren/Renault)
16 Pierre Gasly (Toro Rosso/Honda)
17 Lance Stroll (Williams/Mercedes)
18 Sergey Sirotkin (Williams/Mercedes)
19 Marcus Ericsson (Sauber/Ferrari)
20 Romain Grosjean (Haas/Ferrari)

Copyright © inkhel.com 2024. All rights reserved.