Nizan zanlaiah khan Canadian GP tlan a ni a, pole atanga bul tan Ferrari driver Sebastian Vettel chuan lap tir atanga a tawp thlenga hma hruaiin pakhatna a ni a, a career-ah pakhatna vawi 50 a ni tling ta a ni.

Championship-a hmahruaitu Hamilton chu panganaah thlengin Vettel chu Driver Standings-ah hmahruaitu a ni ta a. Vettel hian 121 points hlawhchhuakin Hamilton hian point khat chiahin a phak lo.

Mercedes driver Valtteri Bottas chu pahnihna niin Red Bull driver Max Verstappen chuan podium a chang bawk. Canadian GP-ah hian thil mak leh nuihzatthlak tak a thleng, chequered flag vai tura tih model Winnie Harlow chuan lap khat a la awm tihin chequered flag a lo vai heh mai.

Vettel chu intlansiak a la tawp loh thu an hrilh nghal vat a, buaina liantham erawh a thleng lo hlauh. He race-ah hian thil danglam a thleng tam lo, intlansiak tir lamah Toro Rosso driver Brendon Hartley leh Williams driver Lance Stroll-te an chesual a, safty car tlantir ni mahse hei bak chu chetsual avanga harsatna thleng a awm lo.

Canadian GP-ah hian Ferrari an chetha khat hle a, kum 14 hnuah a vawi khat nan pakhatna an hauh ve leh ta a ni. Montreal-ah hian Michael Schumacher kha vawi 7 lai pakhatna a ni a, Lewis Hamilton chuan dawtin vawi 6 pakhatna a ni a, Vettel hi vawi 2 pakhatna a ni ve ta a ni.