McDowell's No. 1 Soda Mizoram Premier League Round 6 chu October ni 8, 2015 khan AR Lammualah khelh tan a ni a, Luangmual FC leh Zo United FC te 1-1 in an inhnehtawk a, Bethlehem Vengthlang FC chuan 3-1 in Chanmari West FC an hneh bawk a ni.
Inkhel hmasa zawkah Luangmual FC leh Zo United FC te chu 1-1 in an inhnehtawk a, Luangmual FC lamin goal an khung hmasa a, tan atanga minute 8-na lekah corner atanga ball kal zel chu Lalliansanga chuan a pet goal. Zo United-in an si phurh rulh tum mahse first half-ah an rul hman lo.
Second half 69th mins-ah Zo United FC chuan free kick an hlawhchhuak ta hlauh mai. Lalnuntluanga chuan petin, Luangmual FC goalkeeper Isak Lalmuanpui chuan a man pial hlauh mai, a goal ta. Tichuan 1-1 in team hnihte chu an inhnehtawk ta a ni.
Inkhel hnuhnung zawkah Chanmari West FC chuan goal khung hmasa zet mahse Bethlehem Vengthlang FC lamin goal thum ngawtin an chhang let a, BVT FC hian 3-1 in hnehna an chang ta zawk a ni.
Minute 14-na lekah free kick atangin Lalbiakhlua chuan goal a khung a, BVT FC goalkeeper a chesual. He goal hi 19th mins-ah K. Lalthathanga chuan a rul a, Chanmari West FC goalkeeper khan save thei a nih laiin ani pawhin a thei bik lo, second half-ah MS Dawngliana a che ta a, 49th mins leh 60th mins-ah goal khungin, 3-1 in Bethlehem Vengthlang FC hnehna a changpui ta a ni.
Aizawlah ruah a sur nasa hle a, chhum zing karah inkhel pahnih khelh zawh a ni a, game erawh ni dang a tluk lo hle a, goalkeeper te an che chhe bawk a, Bethlehem Vengthlang FC erawh beisei phak lo nia sawisel an nih mek laiin hnehna ropui tak an chang ta a, point thum hlu tak an hlawhchhuak ta a ni.
Luangmual FC 1-1 Zo United FC
(Lalliansanga 8') ( Lalnuntluanga 69')
MoM : Lalliansanga LFC
Chanmari West FC 1-3 Bethlehem Vengthlang FC
(Lalbiakhlua 14') ( K Lalthathanga 19', MS Dawngliana 50', 60')
MoM : MS Dawngliana BVT
photo credit : PC Lala