Tun January transfer deadline day-ah khan club pathumte chuan players an inthleng kual. Batshuayi chuan loan-in Chelsea tangin Borussia Dortmund a pan a, Aubameyang chuan Dortmund atangin Arsenal a zawm. Giroud chuan Arsenal atangin Chelsea a zawm bawk.
An club thar tan league-ah game hnih theuh an khel hlawm, Europa League-ah BVB chuan Batshuayi an chhawr tawh bawk, Germany-ah Batshuayi a che bon nghal hle.
Bundesliga-ah Batshuayi chuan game hnih khel tawhin goal 3 a khung tawh a, assist 1 a nei tawh bawk. Giroud chuan Chelsea tan game hnih atangin goal a la khung lova, assist vawi khat a nei tawh a, Aubameyang chuan Arsenal tan game hnih khel tawhin goal khat a khung a, assist a la nei lo.
Nizan khan Europa League match-ah Dortmund chuan 3-2 in Italian club Atalanta an hneh a, Andre Schuerrle chuan 30 mins-ah BVB tan goal khungin Josip Ilicic chuan Atalanta tan goal hnih a khung, mikhualin 2 -1 in hma an hruai. Michy Batshuayi chuan 65 mins leh 90 mins-ah goal khung ve lehin 3-2 in hnehna an chang.
Atalanta an hneh tum khan Michy Batshuayi hian ball vawi 44 a tawk a, passes completed hi 80% lai a nei, shots vawi 4 neiin goal hnih a khung bakah chance vawi khat a siam bawk a, take-ons completed vawi 3 a nei nghe nghe.
Aubameyang khan BVB tan a game hmasa pathumah goal 3 a khung a, Michy Batshuayi erawh hi chuan BVB tan a game hmasa pathum atangin goal 5 lai a khung hem mai. Tin, Aubameyang aiin Michy Batshuayi hi a thawkrim zawk a, a tlan hnem fe zawk bawk a ni. Michy Batshuayi hian BVB tan game 3 a khelh atangin goal 6 luhnaah a inrawlh nghal a, goal 5 a khung bakah assist vawi 1 a nei a ni.
Chelsea an chhuahsan hnua chetha ta em em player sawi tur an awm hlawm, Kevin de Bruyne chuan Chelsea a chhuahsan hnuin a thiam zia a pholang chiang hle a, sawi nawn a ngai lovang, tuna Manchester City innghahna player pawimawh ber pakhat chu De Bruyne hi a ni e.
De Bruyne ang bawkin Salah chu Roma tan ropui taka a khelh hnuin Liverpool tan ropui takin a khel chhunzawm, thenkhat phei chuan Messi nen an khaikhin ta mek a nih hi. Michy Batshuayi pawhin Chelsea atangin loan-in BVB a zawm a, a match hmasa pathumah ropui takin a khel nghal pang mai, engtin nge a chet zel dawn tih lo thlir zel ila.