Bul ka la tan dawn chauh: Serena Williams

10th July 2018, 11:07PM

Serena Williams chuan Wimbledon fourth round-ah Evgeniya Rodina a hneh a, quarter final a lut a. Serena hian bul a la tan dawn chauh tih a sawi.

Thawhtanni khan Serena Williams hian fourth round-ah a khingpui Evgeniya Rodina chu 6-2, 6-2 in a hneh a, quarter final-ah Italian world number 52 Camila Giorgi nen Thawhlehni hian an inkhel dawn a. Serena hian Wimbledon quarter final hi vawi 13 a luhna chiah a ni.

Kumina Wimbledon khelh mekah quarter final khelh hmain hmeichhe lama top seed te chu an tla fai vek tawh a, hei vang hian kum 36-a upa Serena tan hian title lak a awlsam phah thei dawn niin a ngaih theih a. Garbine Muguruza, Maria Sharapova, Simona Halep, Petra Kvitova, Venus Williams, Caroline Wozniacki leh Sloane Stephens te chu an tla vek tawh a ni.

Hmeichhe la dam zingah chuan 11th seed Angelique Kerber chu a la sang ber a, 2016 Wimbledon final-ah Angelique Kerber hi Serena Williams hian a lo hneh tawh nghe nghe a ni.

Williams hian fa a neih avangin tennis a chawlhsan deuh vang vang a, kuminah a rawn inkhel chho leh tan a. Hetiang a nih avang hian Wimbledon buatsaihtute chuan Serena hi 25th seed an nihtir a, Serena hian hemi chungchang hi a sawi chhuak leh ngat a.

“Vawi tam tak top seed ka lo ni ve tawh a, tun tumah chuan min dah hniam khawp mai a, pawi pawh ka ti em em chuang lo a. Kumin chu Wimbledon-ah mipa leh hmeichhia rin kai an tla sup sup mai a, hetiang em em a top seed player an tlak hnem hi a la awm lo hial ang,” a ti a.

“Tun dinhmunah chuan seed player zinga la dam pawlah ka tang a, theihtawp ka la chhuah dawn chauh a. Ka la chak ve zel a, theihtawp tak tak ka la chhuah lo a, hmasawnna tur ka la nei teuh a. Bul ka la tan ve dawn chauh a, a hma aia tha zawkin ka la ti chho zel dawn a ni,” a ti bawk.

Hmeichhe quarter final lut zingah Serena tel loin Angelique Kerber leh French Open champion tawh Jelena Ostapenko te chauh chu Grand Slam title la tawh an ni a. Kerber hian 2016 khan Australian Open title leh US Open title a la a, quarter final-ah Russian 14th seed Daria Kasatkina a hmachhawn ang.

Latvian 12th seed Ostapenko chuan Australian Open finalist Dominika Cibulkova a hmachhawn dawn a ni.

Copyright © inkhel.com 2024. All rights reserved.