12 Mar 2018 01:59

inkhel

Brazil coach Tite-a'n Russia World Cup-ah tunge a hruai ang?

Tum dang ang bawkin kuminah pawh Brazil hi FIFA World Cup-a champion rinkai ber te zing ami an ni leh dawn a, tuna zawhna lian ber erawh chu Squad-23 ah hian tutu nge coach hian a hruai ang tih hi a ni.

Brazil hian harsatna lian tham tawk miah loin qualifying round-ah an khel a, awlsam tein 2018 Russia World cup-ah an in pet tling kan ti thei awm e. Chutihrualin World cup trophy vawi 6-na la tur hian an theihna zawng zawng nen an beih a tul dawn.

(adsbygoogle = window.adsbygoogle || []).push({});

Group stage draw neih zawh takah Brazil tan group harsa tak anih hmel loh a, Switzerland, Costa Rica leh Serbia te nen awm hoin; 2014-ah an ramah khelh ni mahse group stage bikah 2014 aiin tun tum group stage ah an tih that zawk a rin thu Brazil coach hian a sawi a ni.

Corinthians Coach hlui hian 2016 atang khan Brazil national team hi a enkawl a, qualifying tha taka an khelh theih avangin a hming pawh a tha thawkhat hle a, chutihrualin World cup-ah enge a an dawn tih chu zawhna lian tak pakhat a ni.

A hmasa berah chuan a hlawhtlin leh tlinloh hril tu pawimawh hmasa ber chu 'Tute nge Russia-ah hian ahruai ang?' tih hi ani a, i han thlir ho dawn teh ang!

Mitam tak sawi dan chuan First XI hi chu a hriat theih mai a, amaherawhchu squad that leh thatloh in kawngro nasa tak a sut dawn avangin squad thlan a pawimawh leh hle dawn a ni.

Brazil hian CONMEBOL qualification-ah point 10 laia falin table-ah hma an hruai a, Russia ticket book hmasa ber pawl an ni!

"Hmun (position) thenkhat hi chu ka thlang fel tawh a, hmun thenkhat erawh thlan fel a har khawp mai. Thlan fel tawh te hi chuan an theihna dik tak min hmuh tawh a, qualifying-ah leh Club tan an khel tha reng a ni"

Roma goalkeeper Alisson Becker leh Manchester City goalkeeper Ederson ten spot khat an inchuh hmel a, mitam zawk chuan tunhnaia a hman rim zawk Roma si-ban-nghak hi an beisei zawk a ni.

Paris Saint-Germain player pahnih Dani Alves leh Marquinhos te tunhnaiah an inkawpfuh chho em em a, Russia-ah an team-mate tho Thiago Silva te nen an zin ho ngei hmel.

Hei bakah hian PSG player palina ni turin tunhnaia inhliam Forward Neymar a tel bawk anga, tichuan Brazil squad-ah hian French club player pali lai kan hmuh hmel ta a ni.

Barcelona player thar Philippe Coutinho leh Liverpool lama a team-mate hlui Roberto Firmino te an tel ngei rin ani a, Firmino tihloh hi chu Chelsea Forward tunhnaia khel tha tak Willian bak Premier League atangin beisei tur dang an awm tam lem lo.

Chutihrualin Manchester City duo Fernandinho leh Gabriel Jesus te hi an khelh chhuna khel chhia an ni ngai lo a, Tite-a list-ah hian an tel beiseina a chhe hran lo. Hemi te pahnih hian qualifying-ah a belhkhawmin goal 7 an thun a, hei hi Lionel Messi, Sanchez leh Felipe Caicedo te nen a in zat a, Edison Cavani chiah an phak lo a ni!

Defender lamah Inter Milan Joao Miranda leh Real Madrid Marcelo te pawh thlawhnaah an chuan ve hmel a, Blancos player tho tunhnaia hliam tawk Casemiro pawh beisei a ni. Casemiro hi a damthat chuan Tite-a hian a hman tam an ring fur a, Zinedine Zidane-a'n thiam takin Toni Kross leh Luka Modric te inkarah a zep thin a, Madrid game-ah a tangkai thin hle.

Barcelona midfielder Paulinho hi Catalan club-a a luh atang khan mi te rin phakbakin a khel tha a, Tottenham player hlui hian qualifying round-ah goal 6 lai a thun a, Neymar nen a in zat chiah a ni.

Tite-a list-a chiang tawh te zinga a tawp ber chu Renato Augusto hi ani awm e. Beyer Leverkusen player hlui hian Chinese Super League-ah a hming a chher zual a, tin 2016 Olympic Selecao squad-ah pawh khan a tel a, Gold medal awrh zingah a tel anih kha.

Brazil-Russia thlawhna chuan la beisei te:

City player thar Danilo hian City a pan hnuah beisei angin hmun a chang tam tawk lo a, Real Madrid player hlui hian Russia zin ve a duh chuan a khelh tam angai deuh dawn a ni.

Juventus full-back Alex Sandro pawh hian beiseina a neih ngei hmel a, tin a Italian club-a a team-mate Douglas pawh mite sawi tam zingah a tel.

Cassio Ramos hi third keeper tura rin ani a, tunhnai Brazil game hnuhnung parukah bench-ah a thu a ni.

Fenerbahce midfielder Guiliano pawh hi beisei teh ang! Kum 27 mi hi 2016 atang khan a khel chhe em em ngailo a, tun ang zela a khelh chuan Russia-ah a zin ve rin a ni.

Kumin World cup-ah Brazil an champion i ring em?