11 Jun 2018 12:14

Inkhel

Mizo Sports Website hmasa ber

​Box to box Midfielder

Tunlai football khawvelah hian box to box midfielder-te hi an tangkai hle a, team pumpui chakna thahrui ber an ni thin a tih theih hial awm e. Box to box midfielder kan tih hian player taima tak sawinate pawh a ni a, taihmak mai piah lamah, thiamna leh thluak finna pawh a ngai tel vek a ni. A chhan chu heng box to box midfielder- te hian mahni box venhim pahin a tul phawt chuan lehlam box-ah pawh goal khung thei tur khawpin thahrui leh chakna leh thiamna an ngahin an nei tha em em a ni.

Tunlaia box to box midfielder lar leh thaa sawi thenkhatte chu Paul Pogba (Manchester United) , Leon Goretzka (Schalke) , Blaise Matuidi (Juventus) , Alturo Vidal (Bayern Munich) , Radja Nainggolan (Roma) tihte hi an ni a, a bak pawh an la awm nual awm e. Heng midfielder-te hi goal venhim lamah pawh an tha em em a, midfield-ah lehlam pawl ball chhuhsak lamah an tangkai em em bawk a, lehlam goal-ah goal va thun thei tur khawpin an hlauhawmin thiamna an nei tha em em bawk a ni.

Chutiang mi an nih avang chuan an thiamna mai bakah an taihmak em em a ngai a, an taihmak dawn chuan thahrui (stamina) an ngah hle a ngai bawk. Heng midfielder-te hi tha tak (world class) an vang hle a, a chunga ka rawn tarlan bak khi chu an awm tho nain, an tam tawh lo a ni. Chuvang chuan heng ang midfielder- te hi mamawhna a sang si a, an tam si lova; duhtu an ngah em em a ni. Saptawng taka sawi dawn chuan mamawhna (demand) a sang kan ti thei awm e. Team khai dingtu an ni thei a, an khelh chhiat chuan team pum pui khelh danin a tawrh phah thin a ni.

Entirnan, Chelsea hian box to box midfielder thar, Bakayoko chu AS Monaco atangin an la a, mahse an rin ang chuan a khel tha thei rih lo. Monaco-a season hmasa-a a khelh dan ang chuan khel thei ta sela, Chelsea team hi in-balance tawk tak tur an ni. Chu chu an beisei vang a ni ngei ang 2016-1- season- a an 'champion' nana player pawimawh em em Nemanja Matic pawh Manchester United lamah an hralh phal hial a nih kha. Mahse Bakayoko hian beisei a la pha lo em em a, Chelsea pawh hian hemi avang hian tun season liamtaah pawh an beisei a pha tawk lo tih kan sawi thei awm e.

Sawi tawh angin Box to box midfielder-te hi an langsar lem lova, han lar vut pawh an tan chuan a har thin em em a ni. Mahse a ruka tangkai em em si an nih avang hian football lam hre ril mite (pundits, experts, analysis) ho hi chuan an dah sang viau zel a ni.

Football- ah chuan an vaiin an pawimawh na meuh mai. Mahse midfield thunun thei zawk zawk hi an chak tlangpui thin, midfield hi a pawimawh lai ber a tih theih awm e. Engkim thlenna hmun pawh ti ila kan sawi sual tam lo vang. Box to box midfielder-te hi lehlam midfielder-te ball sem tur lo tibuaitu leh lo dangchattu ber an ni a. Box to box midfielder tha tak an awm chuan team lehlamin an tum angin an khel thei lo thin a ni.

Chelsea team-ah bawk hian entirna han pe leh ila, 2016/17 season khan an manager Antonio Conte chuan Premier League-a an hman zen zen loh formation hmangin hneh takin a rawn ‘champion’ pui a nih kha. 3-4-3 formation a ni a, hemi formation-ah hian central midfielder pahnih chiah an awm a. Chelsea khan midfielder tha pathum, Fabregas, Kante leh Matic te an nei a. Ball sem thiam lamah Fabregas aia tha hi khawvel pum huap ang zawng pawhin an tam lo hle ang. Chuti chung chuan eng vangin nge Conte khan Matic kha a thlan zawk tlat kan tih chuan, Fabregas chu player fing leh ball sem thiam em em ni mah sela, box to box midfielder a ni tlat lo a ni. He 3-4-3 formation-ah hian box to box midfielder hi an pawimawh zual em em a, awm ngei ngei a ngai a ni.

Fabregas te ang hi chu goal nawr lamahte an tangkai em em a, mahse mahni goal venhim lamah an tangkai lutuk lem lo a ni. A thahrui leh chakna pawhin a tlin lova, Kante leh Fabregas-te dah luh an nih apiang khan Chelsea defence kha a phui lo thin a, mahse Matic a dah kha chuan an phui tha em em a, season tluan khan goal an chhuah tlem em em a nih kha. Matic hi box to box midfielder tiha sawi tur chu a ni chiah lo nain, Chelsea khan midang an nei thlawt si lova, an defence a pawh(pawp) lutuk loh nan Conte khan Fabregas aiin Matic a thlan fo a ngaih phah ta reng a ni.

Season a zova, ‘transfer window’ a inhawn meuh chuan season liam taa box to box midfielder che tha em em, Champions League-ah pawh AS Monaco tana che tha leh tangkai em em mai Bakayoko chu Chelsea chuan an la lut ta vat reng a, Matic chu Manchester United lamah an hralh phal ta hial a nih kha. Mahse sawi tawh angin, Bakayoko hian league thar hlak a zawm a, Ligue 1 atanga Premier League zawmte hian harsatna an tawk fo, Monaco-a a awm laia a khelh anga khelh a nei ta mang lo.Chelsea pawn beisei an pha ta lo reng a ni. Amah a la naupang bawk nen Bakayoko hi season tharah chuan English football lamah insiamrem tawh tura ngaih a ni a. Chumi hunah chuan Chelsea pawh tun aia an that sawt a rinawm.

Box to box midfielder-te hi "counter-attack"-ah hian an tangkai em em a, lehlam pawl lo dang chata; nawr let leh nana a sulsutu an ni thin bawk a ni. Box to box midfielder-te hi defensive midfielder-te nena ngaihpawlh loh tur an ni a, an inang lo a ni. Defensive midfielder-te chu goal venhim lam hi an hna ber a ni a, box to box midfielder-te angin goal nawr an pui ve em em lova, puih ahnekin "full-back" ten attack lama an puih changin, "full-back"-te position an lo luah vat zel zawk a ni.