​Bolton striker hlui Klasnic dinhmun a ngaihtuahawm hle

01st October 2016, 03:10AM

Bolton striker hlui Ivan Klasnic chu a kal (kidney) tha lo avangin a dinhmun a ngaihtuahawm hle. Kum 36-a upa Klasnic hi Bolton tan pawh a lo khek tawh a, game 77 khelin goal 20 a thunsak.

Kum 2006 khan a nu chuan a kal a lo pe tawh a, Klasnic taksa nen a inmil tlat lo. A kum leh 2007 khan a pa chuan a kal a pe vel leh a, hemi hnu hi chuan tha takin football a khel thei nghe nghe.

Nimahsela Doctor-te chuan a vawi thumna ni turin Klasnic hian a kal thlak a mamawh leh tur thu an sawi a, Germany a cheng mek Klasnic hian a taksa endik turin kar khatah Doctor vawi thum a hmuh ngei ngei a ngai thin a ni.

Klasnic hian fanu kum kaw(9) mi lek a nei a, a fanu hian a natna hre lo se a duh thu a sawi.

"Ka dam tha lo a, Doctor ka hmuh fo angai tih a hria. Nimahsela ka natna chhan hi a hre lo a, hre tur pawhin ka duh hek lo. Nun pangngai tak nei tur leh hlauthawng lo turin ka duh a ni," tiin.

Klasnic hian a chhungte dang kal a dawng thei lo a, a taksa nen a inmil dawn loh avangin tih luih ngam chi a ni lo. Mithi taksa atanga a taksa mil tur kal a ngah a ngai dawn a, Germany chuan a tlangpui thuin kum sarih vel nghah a ngai thin a ni.

Copyright © inkhel.com 2024. All rights reserved.