07 Dec 2017 02:41

inkhel

Bengaluru squad-ah Thuammawia a kir dawn

Bengaluru FC chuan an goalkeeper pahnih Gurpeet Singh Sandhu leh Abhra Mondal-te an chhawr theih dawn loh avangin game hnih an khelh turah Lalthuammawia Ralte chu squad-ah an dahtel dawn.

Gurpeet Singh hian hrem a tawh vangin game hnih a khel thei dawn lo va, Mondal thung hi chuan kaihza hliam vangin kar li chhung vel chawlh a mamawh thung.

Indian Super league (ISL)-in thuchhuah an siamah Bengaluru FC hian Mondal thlakna turin Thuammawia hi squad-ah a tel dawn tih an tarlang.

Shillong Lajong goalkeeper hlui Thuammawia hian ke rek hliam vangin tun season-a an game hmasa pathumah hmel a lan thei lo va, pre-season laiin a inhliam a kar ruk chhung vel a chawlh rin a ni hman.

Thuammawia hi Zirtawpni zana NorthEast United FC an hmachhawn hunah leh December ni 14-a FC Pune City an hmachhawn hunah Bengaluru hian squad-ah an dahtel dawn a, inkhel thei khawpa a dam hman beisei a ni.