Bellow-a’n Haye a knock-out

06th May 2018, 05:05PM

Boxing khawvelin a nghahhlelh pakhat chu a thleng ta a, Tony Bellew leh David Haye te chu an inhnek a, round 5-naah Bellew hian Haye hi a knock-out.

Bellew (30-2-1, 19 KOs) hian nikumah khan amah ang bawk, English heavyweight boxer Haye (28-4, 26 KOs) hi a lo hneh tawh a. O2 Arena, south London a an inhnekah hian Bellew chuan Haye hi third round-ah vawi hnih a hnek tlu a, fifth round-ah a hnek tlu leh a ni.

Heavyweight boxer inhnek hmuhnawm ber pawla sawi thin, kum 37-a upa Haye hian tunhma a pha tawh lo hle tih a lang chiang hle a, Bellew chuan ngai a awh phak tawh lohzia a takin a hriattir a ni ber mai.

An inhnek tirh atangin Haye hian nawr viau a tum ang takin a che chho a, mahse pawi a khawih tam lo hle a. Nikumah Bellew hi a lo hneh loh tawh avangin kuminah chuan hneh ngei a tum hle a, a taksa a siam that bakah trainer pawh a thlak hial a, awmzia erawh a awm tam ta chuang lo.

Second round-ah Bellew chuan counter-attack lamah a thatzia a lantir a, a kut a ran bakah a ke chheh a dikin a rang bawk si a ,Haye chuan a hnek fuh mang lo a. Third round-ah Haye hian a nawr leh a, mahse Bellew chuan a bei let thut a, Haye khabeah a hnek fuh a, Haye hi a tlu a, an count nghal a.

An chhunzawm leh a, Bellew hian a khingpui hi a hnek tlu leh nghal a, an tih zui leh hmain dar a rawn ri hlauh a, Haye tan malsawmna dar a tih loh theih loh.

Fourth round an khelh leh hnuah pawh Haye chuan a dawng hnem mial mial viau a, a inveng seng lo a ni ber mai a, mahse mualpho loin hemi round hi chu an la khel tluan thei a. Round 5-na an khel leh a, left hook hmangin Bellew chuan Haye chu a hnek tlu a, Haye chu a ding leh hram hram a, mahse Bellew hian a hnek fuh zui leh zel avangin referee Howard Foster chuan an inhnek chu a titawp ta a ni.

An inhnek zawhah kum 35-a upa Bellew chuan, “David Haye hi boxer tha tak a ni a, min hnek nasa viau a, kei pawhin ka hnek nasa a, kan pahnihin kan na ve ve a. Kum a tam hian speed a lo muang ve zel a, mahse hnek nat zawng chu a danglam chuang lo,” a ti.

David Haye hi kum 6 chhungin vawi 5 a inhnek a, hengah hian a zawnin vawi 2 a chak lo ta a, boxing a chawlhsan mai ringtu an tam a, mahse Haye hian boxing a chawlhsan dawn leh dawn loh hi a sawi duh lo a, hliam na a tawrh loh thu sawiin, a hriselna pawh a that thu a sawi a ni.

Copyright © inkhel.com 2024. All rights reserved.