​Belgian GP-ah Rosberg pakhatna

29th August 2016, 02:08AM

2016 Belgian GP-ah Mercedes driver Nico Rosberg chu pakhatna niin Lewis Hamilton chu tlar hnung atangin bul tan mahse pathumna a rawn ni phak tho!

Red Bull driver Daniel Ricciardo chu pahnihna a ni a, he intlansiakah hian Renault driver Magnussen chu na takin a chesual a, hei vang hian red flag vai hial a ni.

Engine penalty pek a nih avangin Hamilton chuan 21-na atangin bul a tan a, ropui takin Mecedes driver hi a rawn tlan leh a, podium hial a chang phak.

Rosberg pakhatna a nih avang hian championship-a hmahruai mek a team-mate Hamilton chu a hnaih sawt a, point 9 chiahin a thlau ta a ni.

Rei an intlansiak hmain Renault driver Magnussen chu a ke chhiat avangin bangah na takin a insawh a, a car pawh a chhe nasa hle, hei vang hian red flag vai a ni a, Magnussen chuan a keah hliam tuarin damdawi in panpui a ni a, karleha Italian GP -ah a tlan ve thei dawn nge dawn lo a la hriat loh a ni.

Car tinte chu ke thar hman phalsak an ni a, pit atangin bul an tan leh a, Hamilton ang thova tlar hnung atanga bul tan Alonso pawh a tlan tha kher mai, 7-na a ni phak a ni. First corner-ah Raikkonen, Vettel leh Verstappen te an intai a, an chhe nual, hei vang hian anni ho hian podium an beisei ve phak ta lo a ni.

Force India driver Nico Hulkenberg chu palina niin a team-mate Sergio Perez chu pangana a ni a. Intlansiak pakhata Force India team che that ber tum a ni nghe nghe. Vettel chu parukna niin Raikkonen chu pakuana a ni ta a ni.

Belgian GP race result

1. Nico Rosberg, Mercedes, 1:44:51

2. Daniel Ricciardo, Red Bull, + 14.113

3. Lewis Hamilton, Mercedes, + 27.634

4. Nico Hulkenberg, Force India, + 35.907

5. Sergio Perez, Force India, + 40.660

6. Sebastian Vettel, Ferrari, + 45.394

7. Fernando Alonso, McLaren, + 59.445

8. Valtteri Bottas, Williams, + 60.151

9. Kimi Raikkonen, Ferrari, + 61.109

10. Felipe Massa, Williams, + 65.873

Copyright © inkhel.com 2024. All rights reserved.