13 Sep 2017 02:37

Inkhel

Mizo Sports Website hmasa ber

​Barcelona-in si thum faiin Juventus an hneh

Champions League 2017/18 season tan a ni a, game hmasa berah Barcelona chuan Camp Nou-ah Juventus an mikhual, tun tum chu Juventus hian hneh tum hle mahse Messi-a an ngam ta lova, si thum faiin Barca hian hnehna an chang ta a ni.

Buffon a hmachhawn tawhah Messi hian goal a la khung lo, Group D match hmasa berah erawh goal hnih a khung bakah Rakitic goal tur pawh a thawhchhuah sak nghe nghe. PSG chuan Neymar chhuhsak mahse Barcelona hian Messi an la nei miau a, harsatna a nei lo. Tin, an player thar Dembele pawh Barca game-a khel tur tak a nih zia a lang chiang hle a, Juve an hmachhawn tum hian a thawhhlawk hle nghe nghe a ni.

Barcelona 3-0 Juventus

(Messi 45', 69', Rakitic 56')

Barcelona XI: Ter Stegen; Semedo, Piqué, Umtiti, Alba; Busquets, Rakitic, Iniesta; Dembélé, Messi, Suarez.

Juventus XI: Buffon; De Sciglio, Benatia, Barzagli, Sandro; Pjanić, Matuidi, Bentancur; Dybala, Douglas Costa, Higuain.

Juventus-in bul an tan tha zawk a, na takin an nawr nghal. Tan atanga minute rukna lekah Mattia De Sciglio chuan box pawn atangin a shot, Barca goalkeeper ter Stegen chuan tha takin a lo dang. Hemi hnu chiah hian Juventus chuan counter attack an nei nghal, Dybala chuan chance tha tak awmze nei lovah a chhuah.

Minute 15 an khelh tlin hmain Miralem Pjanic shot tha zet chu ter Stegen chuan tha zetin a lo dang leh bawk. Minute 20 an khelh tlin hma hretin Barcelona chuan free kick an hlawhchhuak a, Messi free kick chuan wall a per, hemi per hi Suarez chuan shot chhunzawmin, Buffon chuan ropui takin a lo nam over.

Dembele a khel tha hle a, hnai set sawt atanga a shot chu Juve tlar hnung ten an lo dan sak. Hun tawp dawn tak tak 45 mins-ah Messi leh Suarez an in one-two, Messi ball pek chu Suarez chuan Messi tan lak rem takin a siam a, Messi chuan box chhung a thlenpui hnuin bottom corner-ah a pet lut, Messi hian Buffon venah a vawi khat nan a pet goal ta a ni.

Second half tan a ni chiah tihin Barcelona chuan an nawr nghal a, Messi chuan a goal hnihna a khung nghal teuh kher mai, box pawn atanga a shot tha zet chuan Juventus goal post a per, hemi per leh hian Buffon luah a per leh nghe nghe. 56 mins-ah Barca chuan an goal hnihna an khung ta nge nge. Box dinglam sirah Messi chuan ball chak takin a lalut, a cross a, Juve defender ten an lo dang, hemi per hi Rakitic chuan box chhung atangin a shot goal mawi hle.

Barcelona chuan an nawr chhunzawm zel a, 76 mins-ah counter attack hmangin an nawr thut, Iniesta ball pek tha zet chu Messi chuan dawngin defender pahnih a hel hnuah box pawn atangin kawh zetin a shot, a goal mawi hle, Buffon tan tihngaihna a awm lo. Juventus chuan hun tawp dawn lamah goal khungna chance an nei ve zauh a, Dybala chuan box pawn atangin a shot a, hei hi ter Stegen chuan a lo save hlauh a ni.

Messi hian Champions League game 86 atangin goal 96 a khung tling ta a, Barcelona tan a game hnuhnung pathum atangin goal 7 lai a khung hem mai. Tin, Champions League group stage match hnuhnung 8-a Barcelona goal 19-ah a inrawlh vek a, goal 15 khungin assist vawi 4 a nei nghe nghe.

Group D match pakhat zawkah Sporting Lisbon chuan 3-2 in Olympiakos an hneh a, Barcelona chu Group hmahruaitu an ni nghal a, Sporting chuan dawtin, Juventus chu a mawng phah an ni nghal a ni.

Pictures credit : Reuters