Barcelona chuan Spanish Super Cup –ah Sevilla 2-1 in an hneha, season thar atan cup an chawi nghal.

German champions Bayern Munich pawhin German Super Cup-ah Frankfurt chu ni nga faiin an hneha, anni pawh hian cup an chawi ve nghal.

PSG chuan an League 1 game hmasa berah si thum faiin Caen an hneha, Neymar chuan goal khungin kum 40 Gianluigi Buffon chuan a Ligie 1 game hmasa ber a khel bawk.

Barcelona hi tun hnaia Spanish Super Cup vawi sawm khelh tawha, vawi kuaah an inlana, nizanah captain thar Lionel Messi-a hovin an champion leh bawk.

Barcelona hi 2-1 in an chak a, Sevilla hian goal khung hmasa in 9mins-ah Pablo Sarabia chuan goal hmahruai a khunga, half-time hma lawkin Gerard Pique chuan Barca si phurh a suta, second-half hun tawp dawn hnaih lamah Ousmane Dembele chuan Catalan club tan chakna goal a khung.

Sarabia goal hi a tirah pawm a ni lova, off-side ham a ni a, mahse VAR inrawlhin, ennawn a nih hnuah goal a pawm a ni leh ta a ni.

Sevilla hian hun tawp dawnah an si phurh sutna hun remchang tak neiin, penalty an hmu a, Ben Yedder-a’n petin Ter Stegen chuan a lo save a, an si phur an sut zo lova, Barcelona chuan Spanish Super Cup an chawi.

Nizan German Super Cup inkhelah Bayern Munich chuan 5-0 in Frankfurt an sawp.

Manager thar Niko Kovac-a hnuaiah German champions chuan cup an chawi nghala, Polish striker Robert Lweandowski chuan hattrick siamin, Kingley Coman leh Thiago-te chuan goal khat ve ve an khung. Kovac hian a team hlui Frankfurt hmachhawn nghalin a team thar chu hnehna a chamnpui nghal a ni.

French Ligue 1 khelh tan a ni a, PSG chuan Caen chu 3-0 a sawpin khawvela player manto ber Neymar chuan goal a khung nghal.

PSG tan Italian goalkeeper ropui Gianluigi Buffon chuan inkhel bul a tana, kum 40 mi niin a Ligue 1 game hmasa ber a khel.

Neymar bakah hian Adrien Rabiot leh Timothy Weah-te chuan goal an khung bawka, Ligue 1-ah PSG an la tluang zel.