Barcelona striker hlui Henrik Larsson chuan a khelhna thin Barcelona inkhel en chu FIFA game khelh ang mai a nih thu sawiin, an thiam dan em em chu game a an zawk thu a sawi. Larsson hian Barcelona tan game 40 khelin goal 13 a thun sak hman a ni.
Barcelona 2006 Champions League a champion puitu Swedish Striker hlui hian Helsingborg a enkawl mek a ni. Barca hian La Liga-ah point thumin hma an hruai mek a, Spanish champion ni turin dinhmun tha takah an ding a tih theih. Manchester United tan pawha khel tawh Larsson chuan Barcelona chungchang sawiin," Hun ka neih chuan an inkhel hi ka en ziah thin a, team tha tak an ni. Luis Enrique hian hna tha tak a thawk a ni." tiin Barca boss Enrique hnathawh a fak.
Sweden tana goal 36 zet thun thei Larsson hian Barca chungchang sawi zawmin," A player-te leh an inkhelh dan en hi a awihawm loh hial zawk a ni. A chang hi chuan PlayStation a FIFA khel en ang mai a ni. A pawimawh ber chu nuam ti taka an khel thei hi a ni. Hei mai bakah hian an in nel hlawm em em a, hei hi team tan a tangkai takzet a ni." tiin Barca player-ten inkungkaihna tha tak an neih chu an hlawkpui thu a sawi. Larsson hian a Striker pui Suarez pawh a fak hle a," Suarez hi a hlauhawm hle a ni. Premier League-ah a khel ka hmu tawh thin a, goal a khung theih bakah eng mah lo atang pawhin goal a khung leh mai thin. A che vel hi a fing thin khawp mai, a finishing a tha hle bawk." tiin La Liga a goal 20 khung tawh Suarez chungchang a sawi. Larsson hian Messi chungchang pawh sawiin," Barca a ka awm lai kha chuan a player tha a ni a, tunah chuan player ropui tak a ni tawh." tiin. Larsson hian Iniesta chungchang pawh sawi telin a ball khawih a dik thu leh, player fing tak a nih thu a sawi.