22 Nov 2017 02:23

inkhel

Baihvai taka bulțantu Moses

Khawvela footballer tam tak zingah hian harsa taka bulțan chho an tam a, khawvel hriat tham khawpa lar zingah hian a tam zawk hi harsa taka bulțan an nih pawh a rinawm.

Harsa taka bulțan zingah hian chhungkaw harsa an tam deuh ber a, Nigeria leh Chelsea forward Victor Moses bulțanna erawh fahrah nun ațangin a ni thung.

A HUN HMASA LAM

Moses hian kum 1990 December ni 12 khan khawvel eng alo hmu țan a, apa hi Christian pastor niin Nigeria khawpui Lagos-ah a piang.

Kum 2002 khan Nigeria-a buaina chhuakah a nu leh pa thah an ni a, kum 11 mi anihin nu leh pa a nei tawh lo.

A nu leh pa an boral ațanga kar khat a liam hnuah a chhungkhat lainate'n pawisa thawh khawmin rampawn a dah an rilruk a, England-ah kal tirin inhumhimna an zawntir.

England a thlen hnu hian London chhhim lama awm South Norwood ami Stanley Technical High School-ah a kal a football khelh a ngaina hle bawk.

A hun kal tawh chanchin hi sawiin kum 26 mi ni tawh Moses chuan, "A tirah kha chuan a hautak khawp mai. Nunphung leh tihdan engkim a danglam. Țhian siam a ngai a naupang tak tan chuan ramdanga țhian siam hi thil harsa ve tak a ni."

"England ka pan tirh khan Sapțawng pakhat mah ka thiam lo. Sikul ka luht tirh ațangin ka insiamrem chho va țawng pawh ka thiam ve zel."

"Hemi hnu hian sikul-ah ka in bengbel a țhian ka nei a engkim ka hrethiam ta bawk. Hautak em em mahse ka dam khawchhuak thei." tiin a sawi.

Midang ang bawkin Moses hian in tihhlim nan football a khel ve thin a, a thiam leh theihna in mi mit a hip rang hle bawk.

An chenna bula awm Cosmos 90 FC chuan an hnena khel turin an lalut thuai a, Sunday League khel țhin Cosmos hian hun harsa tawk mek mahse Moses hi a lar chak em em a inkhel entu pawh an pung chak hle.

Hetiang hun lai hi thlirkirin Moses chuan, "Kum 13 mi ka nihin mumal taka in din football club-in a vawikhat nan min dawr a, mipa dangte zinga ka khel an hmuhin thiamna ka nei tih an man thiam."

"Cosmos FC hi Crystal Palace hnena ka chanchin sawitu an ni. Palace hian lokalin min thlir a chumi hnu chuan an kutah engkim a awm tawh." tiin a sawi.

London chhim lama awm Crystal Palace hnenah hlawhtling taka enchhinna (trial) a paltlang hnuin a awm hmun pawh a sawn ve nghal.

Palace hian Croydon-a private sikul țha berte zing ami Whitgift School-ah Moses hi zirna chhunzawm turin an dahlut a, hetah hian engkim a thlawn veka a dawn bakah boaruak thar a hip.

Sawi zelin Moses chuan, "Croydon-a an țawng dan kha a danglam hret a, mahse private sikul boruak chungchang tawnhriat țha tak ka nei."

"Min enkawl dan a țhat bakah zirna pawh duhthusam a ni. Palace-in sikul țha taka min kal tir thei kha ka hlim em em a ka hun hman zawng zawng kha nuam ka ti." tiin a sawi.

Moses hian Whitgift School leh Palace Academy tan kum thum chhungin goal za chuang a khung hman a, School intihsiaknaah a champion pui hnem bakah English Schools Under-14 Cup final-a Healing School an hmachhawn țumin final-a goal lut zawng zawng (goal nga) a khung vek a an champion.

Whitgift School football team hi Chelsea leh Arsenal defender hlui Colin Pates enkawl a ni a, Pates hian kum 1979 leh kum 1988 inkar khan Chelsea tan game 300 chuang a khel a Arsenal tan kum 1990 leh kum 1993 inkar khan a khel bawk.

PROFESSSIONAL HUANG CHHUNGAH

Moses hian Crystal Palace first team tan a game hmasa ber chu kum 2007 November ni 6 khan kum 16 mi niin a khel a, Cardiff City nen 1-1 in an inhnehtawk.

2008-2009 season khan Moses hian game 32 khelin goal hnih a khung a, Championship-ah 15-na niin an buai zui ta bawk.

2009-2010 season kal meka goal ruk a khung tawh laiin kum 2010 January thla khan Palace-in sum lamah harsatna an nei a an buai hle.

Kum 2010 January thlaah Moses hian £2.5 m-in a hunlaia Premier League club Wigan Athletic a zawm a, Wigan tan hian a game hmasa ber chu February ni 6-ah khelin Sunderland nen 1-1 in an inhnehtawk.

Kum 2012 August ni 24 khan Chelsea-in an lalut veleh a, The Blues-ah hian khelhna hmun erawh a chang har hle.

Rafael Benitez hnuaia Chelsea an awm lai khan Moses hian khelhna hmun a chang ve zauh zauh a, kum 2013-a Jose Mourinho a luh khan hmun a chang pha tawh lova Liverpool, Stoke City leh West Ham United-ah te loan-in a khelchhuak.

Chelsea-in Antonio Conte an lak hnuah Moses hian khelhna hmun mumal a chang pah chauh a, Italian manager hian wing-back anga chhawrin a hmang thiam hle.

Moses chuan, "Tun hmain wing-back ang hian ka khel ngai lo. Conte a lo luh khan ka khelhna tur min hrilh min dah nghal bawk. Manager thlawpna neih hi a țha a, min puih nasat bakah ka duh ang lantir turin min pui a inrintawkna minpe bawk."

"Min duh ang ngei hian manager, fans leh club tan khelh ka tum a ka ti hnual lo." tiin a sawi.

Moses hian kum 2012 September ni 15 khan Chelsea tan a game hmasa ber chu QPR an hmachhawn țumin a khel a, a goal hmasa ber erawh League Cup-a Wolves an hmachhawn țumin a khung thung a he inkhelah hian minute 90 chhung a khelh bakah 6-0 in an chak.

The Blues tan Premier League-a a goal hmasa ber pawh kum 2012 November ni 3 khan a khung a, Swansea City nen an inkhelh țumin a pet goal a he inkhelah hian 1-1 in an inhnehtawk.

RAM TAN MOSES

Moses hian age level-a chuan England tan a khel vek a, kum 2005 leh kum 2010 inkar khan England Under-16, Under-17, under-19 leh Under-21 tan a khel.

Senior lamah erawh a pianna ram Nigeria tan khel a thlang a, Nigeria tan hian a game hmasa ber chu kum 2013-ah a khel thei chauh thung.

Nigeria hian kum 2011 February thla khan a vawikhat nan an ko va, mahse FIFA-in tihfel ngai ala awm tih an sawi a hemi kum November thlaah hian FIFA-in engkim tihfel a ni tih an sawi.

Kum 2013 khan Africa Cup of Nations khel turin thlan a ni leh a he intihsiaknaah hian an champion zui a Moses hi an player pawimawh berte zing ami a ni nghe nghe.

Kum 2014 FIFA World Cup khel tu pawin koh a ni leh a, group stage paltlangin Round of 16 an lut a France lakah 2-0 a tlawmin quarter-final an lut zo ta lo.

Moses hian kumin (2017) May thla khan hunrei chhung tak alo zui tawh Josepine chu 'Tiam tlat e' a tihpui a, Josephine nen hian fa pahnih - Brentley (kum 2012-a piang mipa) leh Nyah (kum 2015-a piang hmeichhia)-te an neisa tawh.

Baihvai taka bulțan chho Moses hian Premier League, Europa League leh Africa Cup of Nations trophy a chawi tawh a, Champions League leh World Cup boruak pawh a tem tawh bawk a ni.

MOSES HLAWHTLIN TAWHNA:

English Premier League - 1

UEFA Europa League - 1

Africa Cup of Nations - 1