Ferrari chuan season bul an tan tha hle a, Bahrain GP-ah Vettel chu pakhatna niin, Hamilton chu pahnihna a ni a, pole atanga bul tan Bottas chu pathumna a ni.
Hamilton chu pit luh dawna midang a dan khawmuan avangin penalty pek a ni a, Hamilton hian lap 13-a pit stop a luh dawnin Red bull driver Ricciardo chu a dang khawmuang a, hei vang hian second 5 penalty pek a ni ta a ni.
Penalty pek a nih vang hian Hamilton chu a hnufum ta a, Bottas chu Hamilton-a'n Vettel a um theih nan kian mai turin ti mahse second 12 dawn laia Vettel a fal tawh avangin Hamilton hian a umphak ta ngang lo a ni.
Vettel hian hnehna a chan avangin championship-ah Hamilton aiin point 7-in a fal a. Red Bull hmachhuan Max Verstappen erawh he intlansiakah hian lap 11-naah brake that loh avangin a chesual hlauh a ni.
Bahrain GP-a Vettel pakhatna nihna chhan nia lang chu, Ferrari khan Vettel chu pit stop an neih hmapui a, Hamilton penalty pek a ni bawk nen. Tin, Williams driver Lance Stroll leh Toro Rosso driver Carlos Sainz an insut avangin safety car tlan tir a ni bawk a, kha khan thil tam tak a ti danglam kan ti thei bawk awm e. Hamilton khan pole chang selang chuan Bahrain-ah hian pakhatna a nih ngei a rinawm a ni.
Tun season chu Ferrari leh Mercedes an inum chho dawn niin a lang. A bik takin Vettel leh Hamilton hi an intum chho dawn niin a lang. Bottas leh Kimi Raikkonen te erawhin Hamilton leh Vettel-te pahnih hi chu an khan lo hret dawn niin a lang bawk. Red Bull driver Max pawh hi lam hmaih chi a ni bik lovang.
Mercedes car chak lutuk team dangin an khan lo thin kha a ni a, tun season erawh Ferrari an rawn intuaithar hle a, Mercedes nge chak zawk? Ferrari? Tih chu zawhna chhan harsa tak a ni ta.
Mercedes boss Toto Wolff chuan an car chu Ferrari aia a chak zawk thu a sawi, a dik ngei maithei, mahse race strategy-ah erawh Ferrari team an la tha tluang zel tih a hriat. Hamilton kha pole chang tura rin ni mahse final qualifying lap-ah a tisual hlauh a, Bottas khan a career-a a vawi khat nan pole a chan phah ta kha a ni a.
Bahrain GP race result
1. Sebastian Vettel, Ferrari,
2. Lewis Hamilton, Mercedes, +6.660
3. Valtteri Bottas, Mercedes, +20.397
4. Kimi Raikkonen, Ferrari, +22.475
5. Daniel Ricciardo, Red Bull, +39.346
6. Felipe Massa, Williams, +54.326
7. Sergio Perez, Force India, +1:02.606
8. Romain Grosjean, Haas, +1:14.865
9. Nico Hulkenberg, Renault, +1:20.188
10. Esteban Ocon, Force India, +1:35.711
11. Pascal Wehrlein, Sauber, +1 Lap
12. Daniil Kvyat, Toro Rosso, +1 Lap
13. Jolyon Palmer, Renault, +1 Lap
DNF: Fernando Alonso, McLaren; Marcus Ericsson, Sauber; Carlos Sainz, Toro Rosso; Lance Stroll, Williams; Max Verstappen, Red Bull; Kevin Magnussen, Haas; Stoffel Vandoorne, McLaren.