28 Jun 2017 05:44

Inkhel

Mizo Sports Website hmasa ber

​Badminton Hall chhuat bihchianna (Cement/thing/carpet)

Technology a sang tual tual a badminton khelhna bungraw tha a rawn chhuak thar zel a, racket mai bakah thawmhnaw ah pawh a ro hma chi a rawn chhuak a, pheikhawk pawh a insole quality in hma a sawn zel a, hall chhuat pawh chi hrang hrang kan hmang chho ve mek zel a.

Tunhma chuan badminton khelhna hall tam zawk kha cement chhuat a ni mai thin a.Tunah pawh engemawzat chu a la ni tho a. Mahse hmun tam takah thing kan hmang chho tan a tunah phei chuan synthetic court kan intihhmuh tan a. Hmun hrang hrang atanga min rawn rawn an awm nual takah chuan chiang deuh hleka sawi tha in ka hria a.

Hmasawnna vek anih vangin a lawmawm a,chutih rualin Mizo te hi thil zirchiang vak lova intihhmuh uar kan nih vangin tlem azawng kan hall chhuat dinhmun leh hman dan leh hman zel dan tur, a thatna leh thatlohna thailang ila a tha awm e.

Cement Chhuat

Badminton kan khelhna tam tak hi khawtlang ta, multipurpose hall anih vangin a tul dan anga hmanpawlh a ni a. Hall tam tak hi cement chhuat a ni a. Cement chhuat hi a chang a,pheikhawk a hek duh bawk si,a nal hma bawk si a,tlema a ngap chuan a nal a,taksa in a ngeih lo khawp mai. Cement chhuata inkhel tur chuan pheikhawk manto a uiawm a,a tlo thei silo,mahse pheikhawk mantlawm hi chhuat ruh ah chuan a insole a that vak loh avangin taksa in a ngeih vak lo.

Jump smash phei chu han tih ve vak na chi a ni chiah lova, khelh loh theih loh pawhin singles game aiin doubles game khelh nan a tawk mah mak zawk.A chhuat chang hian khup leh kawng bawr a khawih pawi thei a,fimkhur a ngai khawp mai. Tin cement plaster hi a chhah loh chuan a khawk duh viau bawk a,fimkhur a ngai. Vairama cement chhuat tam takah hian synthetic rubber an hnawih/phah thin a. Hetiang hi carpet a ni chiah lova mahse tlemin shock a absorb ve a rubber layer anih vangin cement lawng ai chuan a thlanawm hle mahse hetiang hi Mizoramah chuan hmang kan la awm lo niin a hriat.

Thing chhuat

Thing hi cement ai chuan a la duhawm hle a. A phah dan azirin shock pawh a la absorb thei zawk a.Cement ang em chuan a chang ve lova duhtawka han khawsak nan chuan thing chhuat hi a iaiawm loh.Amaherawhchu thing chhuat tam zawk hi mistiri lamain an uluk vak thin lova, a thing a lo chang anih phei chuan a rualrem loh duh viau.

Khawvel hmun hrang hranga badminton court tam ber hi thing chhuat a ni hialin a rinawm. Ram dangah hi chuan thing chhuat an rem dawn hian a hnuai zakhamah hian rubber an dah leh a chu chuan shock a absorb tha hle a. A chhuat chu a su deuh dulh dulhin a hriat a mahse taksa in a ngeih zawk a. India rama Academy tha leh stadium lianah hian thing chhuat an hmang vek ti ila kan sawisual awm love.

Hmun thenkhatah chuan thing chhuat an phah in a hnuai a tuihu leh hnawng a cham ban loh nan court pawn,thing chinah khan kut zungchal tiat lek lek hi hmun li hmun nga velah te an verh pawp a chu chuan a mawih tur pawh a ven hmel khawp mai. Hei bakah hian a chhuat hnuailam a langlo tur lai ho zawng kha a nget loh nan diesel chhia emaw alkatra emaw,coal tar emaw an hnawih thin a,a tlo lehzual. Mizoramah hi chuan coal tar hi leitur a awm ve lova mahse diesel/oil chhia hi workshopah dil tur a tam a,an paih mai mai tur thil anih vangin a thlawnin a lak theih thin a. Tin a za kham hnuaia dah tur rubber pawh hi phaiah chuan siamsa a awm a,mahse Mizoramah chuan a awm ve chiah lova chuvangin a awm remchang motor tyre chhia pawh hi a size inang chiah zai chuan a tha ve tho ang.

Thing chhuat enkawl chungchangah chuan a buaithlak ve leh tho mai a. Kan inkhelhna hall tam zawk hi community hall anih vangin a changin vantlang thiltih nana hman anih hian a nal hma khawp mai a. Tunhnaiah hian doctor fixit rawng hi kan hmang lar chho ta viau mai a,mahse hei pawh hi a thap rei chuang lova. Kan hall hian a zirloh vang a ni pakhat a. Phai lama an stadiumah chuan han lut ila entrance ah room hrang hrang a awm hmasa a,chumi hnuah main hallah kan lut thei chauh a.Vaivut leng vel hi hall chhungah a lut meuh lo a ni.

Kan rama hall tam zawkah chuan kawngka luh phatin hall a ni nghal a.Hei hian vaivut a seng lut hnem tlat a.Tin community hall anih angin duh angin a fai hman lova,chowkidarin duh angin an enkawl tak tak bawk silo. Phai lamah hian a chhuat hi rawng an hnawih lo tlangpui a.A tirah antiskid hi an hnawih a,tlema a lo nal deuhin chhuat nawhna hi tui in tlema ti huhin an hru leh a,a lo fai bakah a thap thar leh a,a tlo duh hle.

TV a inkhel kan hmuh ho zawng zawng pawh hi an khelh chhuat chu thing vek ani a,mahse international leh national level tournament tam takah chuan thing chungah hian carpet an phah leh a.A sound han tihrin deuh phei chuan a tum rik dup dup thin hi. Thing chunga carpet phah leh hi chu shock a absord tha hle a,duhthusam a ni. Thing chhuatah hrim hrim hi chuan pheikhawk pawh a tlo duh deuh a,duh anga thalin a chettlat ngam a,mahse a phah lai hian uluk erawh a ngai hle thung.

Synthetic Carpet

Tunhnaiah Mizoram hmun hrang hrangah carpet kan intihhmuh chho a,a man a to deuh nain thil lawmawm lam a ni a,hmasawna chi khatah a ngaih theih a.Carpet tuna kan phah tam zawk hi chu chhuata char beh tur ang chi a ni a.Hman zawha roll leh mai theih chi hi chu a to deuh hlek a,chuvangin a char beh chi hi tuna kan tlin awm tawk vel chu a ni hrih a. A bik takin cement chhuata char beh chi hi tlemin ngaihtuah chian a ngai deuh hlek a. A rubber material hi company azirin a inanglo hlawm a,a chhah dan lah a inanglo. A man tlawm ringawt hi enloh tur a ni a. A rubber ah hian layer chi hrang hrang a awm a,khan layer kha a chhah em? A bik takin a lai a layer kha shock absorber a tha em tihte leh a chung bera rubber material kha a chhah em tihte belhchian a tha a.

A pan lutuk chuan inkhelh in taksa in a ngeih vak chuanglo. Cement chang ai chuan a la thlanawm zawk na in thing chhuat erawh a la tluklo zawk hial ang. Tin chhuata char beh chi rau rau ah pawh a chang chi leh changlo chi a awm a. Tuna R.Dengthuama Hall a an phah ang chi hi multipurpose tana phah a ni bawka a thap viau naa badminton khelh nan chuan a chang mah mah a. Basketball khelh nan pawh a an hman,duh tawka ball an vawm sawh theih na kha chu a dup lemlo tih a hriat sa a. A remchan zawk vangin badminton khelh nan hman a ni ve ta zeuh zeuh a,mahse singles game tang deuh khelh chuan ke zawng zawng hi a kham in a na vek thei a. Chuvangin carpet phah dawn chuan a man kan en rualin a quality en hmasak a pawimawh.

Tin community hall thil dang tih nana hman kawp tur a nih chuan ngaihtuah chian a ngai lehzual. A changa lam zir nan leh thil dang tih nan an hmang fo dawn anih chuan inkhelh laia non marking shoe kan bun ang hian vantlang thilah chuan an bun ve dawn lova,tin a chhuat a lo ngap deuhin chowkidarin a hru fai uluk viau anih loh chuan a ngap khan a tinal a,chu chuan khuareiah rubber kha a lo ei nal a,a dang thlak leh mai a lo harsa tawh bawk si anga,rubber carpeta rawng hnawih a chi silova,rubber carpet nal tawh tihngaihna dang awm tawh si lo chu a chhawrnahawm vak dawnlo.A changa chair leh YMA thutthleng rem anih phei chuan a uiawm lehzual dawn a.

Engpawh nise enkawl uluk a nih chuan rei fe a daih thei a,hall awmdan azir leh maintenance a zir a ni hle bawk. Sawi tawh angin tuna international match kan hmuh te pawh a chhuat thing chungah carpet an phah leh hial zawk a. Carpet phah hian hmasawnna a ken tel pakhat chu footwork that a ngai a,thing chhuat nal tak emaw cement chhuat nal tak chunga kar pawk paha han tleng kha a rem ve lova,pen dik deuh thlarh thlarh a ngai a,a hmang thanglo tan chuan khup velin a tawrh phah theih ve tho.

Kan sum dinhmunin a zir anih chuan thing chhuat chunga synthetic rubber court phah hi a ni a,mahse tun dinhmunah chuan kan la tlin chiahlo anih hmel.

Heng zawng zawng hi uluk taka kan ngaihtuah a thutlukna kan siam anih chuan eng chhuat pawh hi hmang ila nakina kan inchhir loh na tur anih chuan a tha vek a,a pawimawh ber chu kan hman dan tur leh maintenance chhoh dan tur azir thleng khan chhut ila kan tisual in a rinawm loh.

Written by - Maski