​Australian Open : Hmeichhe semi finalist a hriat kim ta

25th January 2017, 03:01PM

Serena Williams chuan 6-2 6-3 in Johanna Konta a hneh a, semi final a lut ve ta. Semi final-ah hian American tennis star unau Venus leh Serena te an lut ve ve a, semi final-ah an chak ve ve a nih chuan final-ah an inhmachhawn thei dawn a ni.

Serena Williams hian semi final-ah Croatian Mirjana Lucic Baroni a hmachhawn dawn. Venus Williams chuan American pui tho Coco Vendeweghe chu semi final-ah a hmachhawn dawn a ni.

Serena Williams chuan, "Johanna Konta kha a khel tha em em a, locker room-a a chezia ka thlir khan nakkin lawka la champion tur a ni tih hi ka chiang a ni. Ani ka hneh thei hi ka lawm tak zet a ni.

"Ka serve thenkhatah khan duhkhawp loh deuh deuh ka nei. Mahse tumruhna nen ka hma lam ka thlir tlat a, hlim takin ka khelh theih phah ta a ni." tiin a sawi.

Serena Williams hian Grand Slam title vawi 22 la tawhin Australian Open-ah hian hun ropui hmuh a tum tlat a ni.

Pictrues credit : Reuters

Copyright © inkhel.com 2024. All rights reserved.