Australian Open hmanga a ropuina tizualtu Federer

29th January 2018, 12:01AM

Roger Federer chuan Australian Open final-ah Marin Cilic hnehin Grand Slam title vawi 20 ala ta a, Australian Open bikah hian vawiruk a champion ta bawk.

Kum 36 mi Federer hian inkhel hmuhnawm takah 6-2, 6-7, 6-3, 3-6, 6-1 in Cilic hi a hneh a, set lina an khelhlaiin talbuai ve deuh mahse a insiamtha leh thuai thei.

Rod Laver Arena-a inkhelah hian khawlum em avangin stadium chung khar a ni a, Federer leh Cilic hi darkar thum leh minute thum an inkhel a a hmunah entu an khat hneh hle.

Final an khelh chhung zawngin Federer hian ace vawi 24 neiin Cilic hian vawi 16 a nei ve thung a, double fault erawh Federer hian nei tlem zawk hretin vawili a nei a Cilic hian vawinga a nei thung.

Swiss superstar Federer hian Roy Emerson leh Novak Djokovic-te record nihrualin Australian Open title vawiruk ala ve ta a, Ken Rosewall hnua Australian Open title la thei upa ber a ni tel.

Wimbledon-ah ringawt pawh vawiriat champion tawh Federer hi Margaret Court, Serena Williams leh Steffi Graf-te hnungzuiin Grand Slam title vawi 20 emaw a aia tam la thei zingah a tel ve ta bawk.

Kumin Australian Open hi belkhawmin a hmunah mipui 743,667 zetin an en a, hei hi Australian Open chanchina entu an tam ber țum a ni.

CHAMPION TURA ROGER FEDERER KALKAWNG:-

First round: Aljaz Bedene (6-3, 6-4, 6-3)

Second round: Jan-Lennard Struff (6-4, 6-4, 7-6)

Third round: Richard Gasquet (6-2, 7-5, 6-4)

Fourth round: Marton Fucsovics (6-4, 7-6, 6-2)

Quarter-final: Tomas Berdych (7-6, 6-3, 6-4)

Semi-final: Chung Hyeon (6-1 5-2 retired)

Final: Marin Cilic (6-2, 6-7, 6-3, 3-6, 6-1)

Copyright © inkhel.com 2024. All rights reserved.