​Australian Open 2017 : Williams unau an final dawn ta e

26th January 2017, 08:01PM

A vawi kua nan Serena Williams leh Venus Williams-te chu Grand Slam final-ah an intum dawn ta. Vawiin khan American unau hian Australian Open 2017 hmeichhe semi final-ah an khingpui ve ve an hneh a, final an lut a ni.

Kum 35 mi World number two Serena hian Croatian Mirjana Lucic-Baroni chu 6-2 6-1 in a hneh a. Semi final hmasa zawkah thirteenth seed kum 36 mi Venus chuan a American-pui Coco Vandeweghe chu 6-7 (3-7) 6-2 6-3 in a hneh bawk a. Venus hian kum 2009 hnua a vawi khat nan Major final a lut ve leh ta a ni.

Serena hi a champion a nih chuan Open-era record 23rd Grand Slam singles title a siam dawn tihna a ni a. Tin, Australian Open-ah a vawi sarih nan a champion dawn tihna a ni bawk. Hetih lai hian Venus hian Melbourne-ah a vawi khat nan title lak a tum ve dawn a, a champion a nih hlauh chuan major title 8 a la ve dawn tihna a ni dawn a ni.

Venus-i'n a khingpui a hneh hnuah, "Serena inkhel hi a hmuhnawm em em, ball a vuak nat dante hi khingpui hautak tak tur a ni. Kan pahniha final kan khel thei a nih chuan chu chu ka duhthusam a ni," tiin a sawi.

Serena chuan hnehna a chan hnuah, "Venus hi ka chhuang hle a ni, mi tiphur thei a ni a, final kan khel dun thei tur hi ka lawm a, ka duhthusam a thleng a ni. Ka hmachhawn tawhah chuan ani aia tum hahthlak an awm lo," tiin a sawi a ni.

Pictures credit : Reuters & Getty

Copyright © inkhel.com 2024. All rights reserved.