Roger Federer chuan 6-4 3-6 6-1 3-6 6-3 a Rafael Nadal hnehin 2017 Australian Open Champion a ni ta a ni.

Kum 2004 atanga kum 2010 inkar kha chuan Federer leh Nadal hming a langsar. Chutah Djokovic a rawn chungnung chho ta a, Nadal leh Federer an chuai ta niin khawvel chuan a ngai.

2011 French Open hnuah a vawi khat nan player pahnihte hi Grand Slam Open Final-ah an inhmachhawn leh a, Australian Open vawi 100 a khelhnaah kum 35 mi Swiss star Roger Federer chuan kum 30 mi Spanish Rafael Nadal chu a hneh a, Melbourne Park-ah hian Roger hian Major titles a vawi 18 nan a la ta a ni.

An inhmachhawn tawhah Nadal erawh a la chungnung zawk tho a, vawi 23 lai Nadal a chak a, Federer chu vawi 12 a chak thung. Hetia Roger a rawn champion leh takah chuan khawvel tennis fan ten Roger an chhuang tak zet a, kum 35 mi ni tawh mahse ani aia tha la ngah zawkte aia chungnung a rawn ni leh ta hi fak loh theih a ni lo a ni.

Set tin a hmuhnawm a, Set 5-na a hmuhnawm zual. 4-3 in Roger chuan hma a hruai, Nadal-a serve a laksak hnuah 5-3 a ni a, game hnuhnung berah Nadal chuan Federer-a serve a laksak ve leh mai dawn niin a lan laiin Roger chuan a Deuce pui ta a, a ball vuak hnuhnung ber chu a out emaw an ti hman, mahse a lo out si lo, a champion ta a ni.

Darkar 3 leh minute 38 an khel a, Roger hian ace vawi 20 lai a neih laiin Nadal erawh chuan vawi 4 chiah a nei. Hetih lai hian Roger hian Unforced Errors a nei hnem hle a, Nadal chuan vawi 28 chiah a neih lain Roger chuan vawi 57 lai a nei thung a ni.

Hranghlui tia miin an sawi chhoh mek Nadal leh Roger te Australian Open 2017 final-a an inhmachhawn hlawl hi a ropui a, kumin chu Tennis khawvel a hot chho leh dawn a ni.

Trophy mawi tak a chawi hnuah Roger chuan, "Nadal-a lo kir leh hi ka lawm a, thla nga liamta kha chuan keini pahnih hi he final-ah hian kan inhmachhawn tuman an ring lo. Mahse kan intum ta si a, vawiin hian chak lo mah ila ka lawm tho tho.

"Tennis-ah hi chuan chak zawk an awm a ngai thin. Vawiinah erawh Nadal nen hian kan intluk niin ka hria. Mite chuan kan thawkrim hle niin an ngai, a dik reng a, kan thawk rim a ni. Nadal hian tennis chawlhsan mai lo se ka duh a, Tennis khawvel hian a mamawh a ni. Kei pawh ka la chawl mai dawn lo, nakkumah helaiah hian inhmuh leh ngei kan tum dawn nia," tiin a sawi.

Pictures credit : Reuters & Getty