​Australian bowler Shaun Tait-a'n Cricket a chawlhsan

27th March 2017, 11:03PM

Australian fast bowler Shaun Tait chuan kum 34 mi niin Cricket a chawlhsan thu a puang. Tait hi hliam neuh neuh avangin a buai ve reng a, a hliam a dam fel theih meuh loh avangin Cricket chawlhsan mai a thlang ta a ni.

2007 ICC World Cup-a Australian an champion tuma player che tha ber pawl Tait chuan, "Cricket hi kum engemaw chen chu khelh ka la duh. Ka tana harsatna awm chu ka kiu(elbow) a hman tlak tawh loh hi a ni. Kum 34 ka ni tawh a, khelmual chhunga tangkaina ka nei tam tawh loh avangin Cricket chawlhsan mai hi a tul a ni. Game khelh dan a rang tial tial a, kei erawh ka che muang tulh tulh a ni," tiin Cricket khelh la chak hle mahse chawlhsan a tul thu a sawi.

2007 World Cup khan Tait hian wicket 23 zet a la a, ani aia wicket la hnem an awm lo. Australia tan test match vawi hnih khelin ODI game 35 a khel hman bawk. Cricket khelh dan hmuhchhuah thar ber T20-ah Aussies tan hian game 21 a khel hman bawk. January 2016 khan India a hmachhawn a, hei hi ram tana a khelh hnuhnung ber a ni ta a ni.

Tait hi Cricket khawvela ball vawm na(kawh) ber pawl a ni a, kum 2010 khan England an hmachhawn tumin 161.1 kmph zeta chakin a bowl a, hei hi International cricket-a ball vawm nat ber pawl a ni. A bowling na tak hi a taksa-in a tuar a, kum 34 mi lek niin Cricket a chawlhsan phah ta a ni.

Cricket Australia CEO James Sutherland chuan, "A vanglai na na na kha chuan Shaun hi khawvela ball vawm na ber a ni. Khawvela batsman tha ber ber a vawm out kha hmuh a nuam thin hle. A vanduai a, inhliam neuh neuh avangin a duh angin a khelh tam theih loh phah a ni," tiin Tait chu ball vawm na bik a nih thu a sawi.

Copyright © inkhel.com 2024. All rights reserved.