​August ni 26-ah Mayweather vs McGregor

15th June 2017, 04:06PM

A thleng tak tak dawn em? Tia mipuiin kan thlir thup laiin boxing world champion lo ni tawh Floyd Mayweather leh UFC champion Conor McGregor te chu boxing ring chhungah an inhnek dawn ta e.

An inhnekna hmun tur hi Las Vegas-ah a ni anga, August ni 26-ah he inhnek ropui hi neih a ni dawn a ni. American kum 40 mi Mayweather hian twitter-ah video post-in an inhnek tur thu hi a tarlang a, kum 28 mi Irish UFC lightweight champion McGregor pawhin twitter-ah an inhnek tur thu a sawi chiang bawk.

A tir lamah sum an hui tur chungchangah an inrem lawk thei lo niin a lang a, mahse tunah chuan engkim an inrem fel ta a, an incho zek zawk bawk a, fighter pahnihte hian an inhnek atang hian $100m (£78.4m) ve ve an hlawh dawn a, boxing history-a sum tamna ber a ni dawn ta bawk a ni.

Five-weight champion lo ni tawh Mayweather hi kum 2015 khan hneh loh tawng lovin boxing a chawlhsan a. A hunlaia boxer ropui ber tia sawi thin Mayweather hian mi 49 hnekin, heng ho hi a hneh vek a, Rokcy Marciano record a nihrual bawk.

Mixed martial artist McGregor hi cage chhungah chuan ropui hle mahse boxing ring chhungah erawh a la inhnek miah lo. Kum 2016 November thla khan McGregor hi dual-division champion niin a fight apiangah sum a tam thin hle a, cage chhungah Mayweather a cho nghal bawk a, mahse boxing ring chhungah an inhmachhawn dawn ta zawk a ni.

Nikum December thla khan McGregor hian Mayweather hnek tumin California State Athletic Commission hnuaiah Boxing license a la a, heta tang chuan engkim a tluang chho ta purh a ni.

"Kan inbe rei angreng, mahse Floyd hian mi leh sa tha tak tak a neih avangin engkim a tluang chho ta purh a. Thil theih loh nia ngaih chu tunah chuan a theih ta a, inremna kan nei ta a ni.

"Conor McGregor hi a chak ang tih ka sawi thei lo, Floyd Mayweather pawh hi a chak ang tih ka sawi thei bawk lo.

"An inhmachhawn chhan chu McGregor hi a eizawnnaah hian a lian tawk a, khawi hmunah pawh; tu pawh hmachhawn kan phal sak, Floyd Mayweather hi knock out a tum dawn a ni," tiin UFC president Dana White chuan a sawi.

Copyright © inkhel.com 2024. All rights reserved.