Indian Super League (ISL) title vawi hnih lo la tawh ATK chuan 2018-19 season atan Sheikh Faiaz an la fel a, Mizo midfielder Malsawmzuala pawh an beisei mek.

ATK hian kum 23-a upa Faiaz hi an be fel a, Super Cup khelh zawh chiaha Mohun Bagan tana winger tangkai em em mai hi a che tha thei hle a, hei vang hian ATK chuan hma sawn zel an tumna kawngah an lalut a ni.

Mohammedan SC player hlui Sheikh Faiaz hian Green and Maroons hi tun season tirah khan zawmin, Calcutta Football League lamah a hming a chher nghal vat a, a club te hi pahnihna a nihpui a ni.

Sheikh Faiaz hian dinglam leh veilamah a khel thei ve ve a, Mohun Bagan tan tun season chhungin game 21 a khel thei a, heng zinga 11 ah hian bul a tan a, goal thum chu a thun a ni.

Sourav Ganguly team ATK hian Malsawmzuala hi an melh ru mek bawk a. Bengaluru FC midfielder Sawmtea hian 2017-18 season chhung khan ISL game a khel miah lo a, substitute bench-ah chuan vawi 6 chu a thu a, khelmualah a inlan lo tluanchhuak a ni.

Sawmtea hi AFC Cup game 7 an khelh tawhah a tir atangin an la khelhtir vek thung a, coach Albert Roca chuan first team lama a chhawr ngun deuhte chu a chawlh hahdamtir avanga hmun chang thei a ni chauh thung.

Delhi Dynamos player hlui hian Super Cup lamah game khat chiah a khel a, semi-final a Bengaluru in 4-1 a Mohun Bagan laka hma an hruai tawh hnu, hun tawp hma deuh chiahin Sawmtea hi an luhtir a ni.

Faiaz hian ATK ah hian Mohun Bagan lama a lo khelhpui tawh Ricky Lallawmawma chu a zawm ve leh dawn a. ATK hian a hmain Kalu Uche leh John Johnson te an lo lalut tawh a, Arnab Mondal leh Cavin Lobo te pawh an be leh mek bawk.