​Asian Cup Qualifier-ah India-in Myanmar an hneh

29th March 2017, 01:03AM

2019 AFC Asian Cup qualification Third Round-a an match hmasa berah India chuan Myanmar an tlawh a, kum 64 hnuah India chuan Myanmar leilungah hnehna an chang leh ta a ni.

India hi Group A-ah Myanmar, Kyrgyzstan leh Macau te nen an awm hova, Thuwunna Stadium, Yangon-a inkhelah hian goal awmchhun hi Sunil Chhetri khung a ni.

Myanmar 0-1 India

Sunil Chhetri 90'

Myanmar XI: Thiha Si Thu (GK), Zaw Min Tun, David Hitan, Yan Aung Kyaw, Tin Win Aung, Aung Thu, Kyaw Ko Ko, Yan Naing Oo, Phyo Ko Ko Thein, Si Thu Aung, Thein Than Wi

India XI: Gurpreet Singh Sandhu (GK), Pritam Kotal, Sandesh Jhingan, Anas Edathodika, Narayan Das, Rowlin Borges, Eugenson Lyngdoh, Jackichand Singh, Sunil Chhetri, Jeje Lalpekhlua, Robin Singh

Myanmar game a tir atangin a tha nghal a, ball pawh an chang hnem, short pass mawi tak tak an lantir bakah rang tak takin an dawk zawk zawk a, India team-in khelh har an ti hle. Hetih lai hian chance hlauhawm erawh India-in an nei tha zawk a, first half-ah Jeje Lalpekhlua chuan mual veilam sir atanga cross chu a tlawh goal phak lo chiah chiah, hemi ball kal zel hi Jackichand Singh chuan hnai set sawtah goalkeeper pawh awm lovah a pet over.

Counter attack-ah Myanmar an hlauhawm a, Kyaw Ko Ko a tal na hle, first half tawp dawnah box dinglam sir atangin lei hrulah kawh zetin a shot, India goalkeeper Gurpreet Singh chuan a khawih phak lo, a goal dawn nia a lan laiin lei hrulah a out chiah chiah a ni.

Second half-ah pawh Myanmar an khel tha chhunzawm zel a, India an bet chhunzawm zel bawk. Bench atanga lut Udanta Singh chu India chakna hnar a ni ta. 90 mins a ni a, Jeje Lalpekhlua chuan halfwayline bulah ball changin mual dinglam sira Udanta tan through ball a pe, Jeje-a ball pekna hi a fing kher mai.

Chutah Udanta Singh chuan chak takin mual dinglam sirah chuan ball a um a, a cross, box chhunga lo awm India Captain Sunil Chhetri chuan tihsual nei miah lovin vawi khatah a shot nghal, Myanmar goalkeeper Thiha Si Thu chuan a khawih phak lo chiang kher mai, a goal mawi hle, Sunil Chhetri hian ram tan goal 53 a khung tling ta a ni. Hun a tawp chhunzawm a, India chuan si khat faiin hnehna an chang ta a ni.

June ni 13-ah India hian Kyrgyzstan an mikhual anga, September ni 5-ah Macau an tlawh ang, October ni 10-ah Macao an mikhual leh anga, November ni 14-ah Myanmar an mikhual ve thung anga, kum 2018 March ni 27-ah Third Round Group match hnuhnung berah Kyrgyzstan an tlawh dawn a ni.

Copyright © inkhel.com 2024. All rights reserved.