​Arsenal-in £44m-in Alexandre Lacazette lei an tum

24th June 2017, 07:06PM

Arsenal boss Arsene Wenger chuan France striker Alexandre Lacazette chu Emirates Stadium-a seng luh ngei a tum ruh hle a, inbiakna thui tak kalpui a ni tawh a, karleh tir lamah chuan an inrem theih mai a rinawm niin The Sun chuan a tarlang.

Alexandre Lacazette hian Spanish club Atletico Madrid a zawm mai tawh dawn emaw tih laiin Madrid club hi Fifa chuan dan an bawhchhiat avangin player thar lakluh an phal sak lo. Hei vang hian Lacazette chuan Madrid hi a pan lo mai chauh nia ngaih a ni.

Wenger chuan Monaco striker Mbappe chu duh hle mahse Real Madrid lam an chungnung zawk nia a lan avangin khaw dang a hawi ta nia ngaih a ni.

Arsenal hian Lacazette manah £44million an thehchhuak nia report a ni a, an inlei thei a nih chuan kum 2013-a Wenger-a'n Ozil a leina £42.5m kha a rawn khum dawn a ni.

Kum 26 mi Lacazette hian French top flight-ah game 203 khel tawhin goal 100 a khung tling tawh a, nikum khan West Ham chuan an lo rim reng tawh a nih kha. Lyon chuan an striker hi an chan dawn nia an hriat avangin Bertrand Traore chu £16.5million in an lalut fel tawh a ni.

Copyright © inkhel.com 2024. All rights reserved.