Zanin dar 11:30 ah Argentina leh Croatia te chu Nizhny Novgorod Stadium ah an inkhel dawn a, Argentina hi an game hmasaah an chak zawh loh avangin knock out stage thleng chho zel tur chuan chak an mamawh hle.
La Albieleste te hi Iceland nen inkhelin 1-1 in an inhnehtawk a, he inkhelah hian an thiampuipa Lionel Messi chuan penalty a pet goal lo nghe nghe a ni.
Croatia hi an game hmasaah an chak a, Nigeria an hneh a, mahse an tan chanchin lawmawm a inzawm vek bik lo a. An striker chhuanvawr pakhat Nikola Kalinic chu an inkhelh hmasak hian substitute bench atanga a luh duh loh avangin coach chuan an ramah a thawn haw a ni.
Chuti taka mi rin kai ni lem lo mahse Group C ah chuan point 3 hmu awm chhun Croatia hi point hmu sang ber an la ni a, Argentina leh Iceland te chuan point 1 ve ve hmuin pahnihna dinhmunah an ding mek a ni.
Iceland nen an inkhelh tum khan South American team te hi Messi chungah an innghat nasa lutuk a, an chet fuh loh phah a tih theih a. Messi hian season hman zawh takah khan goal 44 a thun a, European Golden Shoe a dawng a. Mahse, Hannes Halldorsson chu a pal tlang thei ta lo.
Argentina coach Jorge Sampaoli chuan Lionel Messi hi a chhan hle a, point 3 an hmuh loh chhana Messi burbun vek chu thil tih awm loh tak a nih thu a sawi a. Zaninah group hmahruaitu an hmachhawn zui dawn a, an hmabak hi a khirh ve hle dawn a ni.
Liverpool defender Dejan Lovren chuan Premier League-ah Argentina leh Manchester City striker Sergio Aguero a veng hneh thei viau mai a, zaninah pawh hian an inven leh ngei a rinawm.
Argentina tlar hnung lampang hi chuti lutuka chhuanawm an ni bik lo a, hei vang hian harsatna an tawk zeuh zeuhin a rinawm hle a. Croatia in theihtawpa an nawr chhoh chuan defender te an tal buai viau thei a. South American ho hian an game hnuhnung 6 ah goal 12 an chhuah tawh a, hei vang hian Croatia lakah chuan tlar hnung tihphui viau a ngai ang.
Angel Di Maria aiah Boca Juniors wideman Cristian Pavon chuan a khelh a rinawm a, kum 22-a upa Pavon hi English club thenkhatin an hmutai hle a, mahse Barcelona chuan an lakluh an ring fur hlawm.
Anni ram pahnih hi a hmain vawi 4 an lo inhmachhawn tawh a, Argentina hi vawi 2 an chak tawh a, Croatia hi vawi 1 an chak a, vawi 1 chu an inhnehtawk a. World Cup bikah chuan vawi 1 chiah an la inkhel a, 1998 khan group stage-ah Argentina chu Mauricio Pineda goal hmangin 1-0 in an chak a ni.
Croatia hian World Cup bikah South American team vawi 4 an hmachhawn tawh a, a tlawm zawkah an la tang vek a. Nigeria nen an inkhelhin an chak a, World Cup bikah 1998 hnuah a zawnin an la chak miah lo a. World Cup game 5 an khelh hnuhnunah goal an la thun vek a, a zawna an la thun rei ber a ni.
Argentina forward Lionel Messi hian a hmain tum hnih Croatia a hmachhawn tawh a, goal a la thun ve ve a. March 2006 khan Argentina tana a goal hmasa ber a thun a, he goal hi Croatia nen an inkhelha a thun a ni.
Messi hian World Cup-ah goal shot 21 chhungin goal a thun tawh lo a, a goal thun hnuhnung ber chu June 25, 2014 kha niin, Nigeria lakah a thun a. Tun tumah goal shot 11 a nei a, hei hi Iceland nen an inkhelh khan niin, vawi khat inkhelha goal shot a ngah ber tum a ni a, goal erawh a thun rih lo.
Croatia defender Vedran Corluka chuan an ram tan vawi 99 a khel tawh a, zanina a khelh chuan ram tan vawi 100 a khel tling dawn chiah a, Croatia tan 2018 World Cup squad zingah hetiang zat khel tling thei pahnihna a ni ang a, Luka Modric chuan Croatia tan hian game 100 a khel tling tawh a ni.
Argentina (4-2-3-1): Willy Caballero; Eduardo Salvio, Nicolas Otamendi, Marcos Rojo, Nicolas Tagliafico; Maximiliano Meza, Javier Mascherano; Lucas Biglia, Lionel Messi, Cristian Pavon; Sergio Aguero.
Croatia (4-2-3-1): Danijel Subasic; Sime Vrsaljko, Dejan Lovren, Domagoj Vida, Ivan Strinic; Ivan Rakitic, Luka Modric; Ante Rebic, Andrej Kramaric, Ivan Perisic; Mario Mandzukic.