All India Football Federation-in India rama Futsal mumal zawka kalpui a tumna kal zelah, AIFF leh Mizoram Football Association țangkawp chuan April 18, 2017 hian Rajiv Gandhi Stadium, Mualpui, Aizawlah Futsal lam zir chianna leh bul țanna tur hun a buatsaih dawn.
Hei hi a hmingah, "Futsal Introductory Workshop" tih a ni a, AIFF leh MFA buatsaih tur a ni. Resource person atan Sanjay Kumar, AIFF Senior Manager, Competitions a lo kal dawn a, amah hi Asian Football Confederations hnuaia Futsal leh Football-a Match Commissioner a ni.
Sanjay hi Asia ram hrang hrangah AFC Futsal Competition hrang hrangah match commissioner a ni țhin a, Mizoramah hian FIFA dan leh AFC leh AIFF duh anga Futsal bul țan dan tur a rawn kawh hmuh dawn a ni.
Amah hi tun I League season țan hmaa Mizorama lo kala Rajiv Gandhi Stadium line rin hrang hrang dik tawk lo tia rawn rin țhat puitu kha a ni a; AIFF hnuaia Match Commissioner hrang hrangte training petu țhin a ni.
He hunah hian thupui hrang hrang - Futsal Laws of the Game, Futsal in Asia, History of Futsal, Comparision between Futsal and Football leh a dangte a zirtir dawn a, practical pawh tih tur a ni ang.
AIFF chuan "Futsal Introductory Workshop" neih zawh hian a tahtawlin Futsal Referee Instructor leh Technical Expert pawh an rawn la tir leh dawn a, India ram pum huap Futsal inelna an siam dawn a ni.
India ramah kumin ațangin AIFF chuan Futsal hi mumal zawka kalpui a tum a, March 23, 2017-a AIFF Executive Committee meeting chuan AIFF Futsal Committee a din a, Mizoram chhunga Futsal kalpui turin MFA pawhin tun hnai khan MFA Futsal Committee a din thar bawk a ni.
MFA Futsal Cup 2017 chu May 4, 2017 ațangin Aizawlah khelh a ni dawn a, hemi atan hian eng team pawh tel theih niin April 11-28, 2017 thleng MFA Office, City Park-ah entry fee a pek theih.
"Futsal Introductory Workshop" ah hian he lama a tui mi a duh apiang tel theih a ni a, FIFA dan hnuaia AIFF leh MFA hriatpuia Futsal inelna buatsaih duhtu, Futsal referee tura inchher duh leh Futsal tuipuitu tu pawh tel theih a ni.
He workshop-a tel duhte chuan MFA Office, City Park-ah April 12-17 inkarah office hun chhungin regustration fee Rs 50/- pein a inziah luh theih a, MFA Futsal Committee chuan Futsal lama tui mi tu pawh tel turin a sawm.
- Issued by Information & Publicity Committee, MFA