Boxing lama tui mite chuan tu nge Anthony Joshu hi kan hre vek awm e. He British boxer hi tunlai boxing khawvelah chuan a thiam ber ang hiala sawitu pawh an tam hle. Professional a nih hnuah hneh loh a la tawng lo. A chanchin tlem azawng han tarlang teh ang.

A hmingpum chu Anthony Oluwafemi Olaseni Joshua niin October ni 15, 1989 khan a piang a. British mi niin boxing khawvela major title pali awm zinga pathumah unified heavy-weight champion a ni mek. IBF title hi 2016 atang khan kawl tawhin, WBA(super) title hi 2017 atang khan kawl tawh bawk a, WBO title hi kumin March thla atangin a kawl tawh bawk a ni.

Anthony Joshua-a nickname hi 'AJ' a ni a, feet 6'6 -a sang a ni a, a ban thui zawng (reach) hi inches 82 lai a ni. A stance hi orthodox niin fight record a nei tha hle bawk. Mi 21 a hnek tawh zingah amah hneh thei an la awmloh mai bakah mi 21 atangin mi pakhat chiah knock-out lovin a la hneh. Chak loh a la nei lova, mi 21 a hmachhawn tawh atangin mi 20 a KO thei anih chu!

England aiawhin amateur angin 2011 World Championships super-heavyweight divison-ah a lo chhuak tawh a, khami tum khan silver medal a hawn nghe nghe a ni. 2012 Olympics- ah Great Britain aiawh lehin gold medal a la leh bawk.

2014-a professional boxer a nih hnuin The Ring magazine chuan "Prospect of the Year" - ah thlangin, 2017 -a Wladimir Klitschko nena an inhnek hmuhnawm tak chu The Ring magazine leh Boxing Writers Association of America-te chuan "Fight of the Year" - ah an lo thlang tawh bawk.

A hnek nat em vangin hriat hlawh ni bawk a, Anthony Joshua hian a hmachhawn tawhte zingah Joseph Parker chiah a la KO lova, Joshua hi Deontay Wilder hmachhawn tur anga sawi rik ni mahse engmah thil chiang a la awmlo a ni.