Andy Murray-a'n Dubai Championship nomawi a chawi

05th March 2017, 09:03AM

British mi World No.1 Sir Andy Murray chuan a vawikhat nan Dubai Championship-ah nomawi a chawi a, final inkhelah Fernando Verdasco chu set hloh lovin a hneh.

Andy Murray leh Fernando Verdasco-te hi darkar khat leh minute 14 chiah an inkhel a, Murray hian 6-3 6-2 set la in a khingpui hi a hneh a ni.

Kum 2017-ah Murray hian a vawikhat nan tophy a la a, Dubai Championship hi a trophy 45-na chiah a ni bawk.

BBC Sport tarlan danin Murray chuan, "He hmunah hian a vawikhatna atan champion ka ni a, nuam kati in a ropui kati hle a ni.

"Ka tan chuan kum bul tan dan duhawm tak a ni a, inelna ka hmachhawn leh zel turah pawh inrintawkna min pek ka beisei.

"Ka inkhelh hnuhnung pahnihah khan ka bul ka tan tha lova, rauh a sur deuh avangin inkhelh a harsa hle. Keimah chauh ka ni lova, player dangte pawhin harsatna an tawk tho niin ka hria. Final erawh a dan a dang ta deuh a, boruak nuam tak hnuaiah kan inkhel a, bul ka tan tha in a tawp pawh tha takin ka khar thei a, ka lawm khawp mai.

"Nikum lamah Indian Wells leh Miami-ah te ka kheltha tawk lova, kuminah erawh hma ka sawn dawn viauin ka hria. Bul tha taka ka tan theih avangin ka lawm a, ka chhunzawm zel theih ka beisei, "tiin a sawi bawk.

Copyright © inkhel.com 2024. All rights reserved.