​An result-ah Lajong coach a lungawi lo

18th January 2017, 12:01AM

Hmarchhak club zinga I League khel hmasa ber leh hlun ber tih ngam Shillong Lajong an che fuh hleithei lo. I League season kal mekah game thum khel tawhin point khat mah an la hmu lo a ni. Lajong hian khualmualah Bengaluru leh East Bengal an hneh loh hnuin vawiin khan Aizawl FC lakah 2-1 in an tlawm leh a, Lajong coach Thangboi Singto chuan Aizawl FC laka point khat tal hmu tur an nih thu a sawi.

Inkhel chungchang sawiin Thangboi chuan, "Penalty kan hlah hnu pawh khan, kan khel tha em em a, goal ho tak kan chhuah a ni. Point 1 chu hmu tur kan niin ka hria," tiin Aizawl FC laka point an hmu lo chu hriatthiam a har tih a sawi.

Lajong hian penalty vawi hnih lai an hmu a, penalty hmasa zawk hi Brazilian forward Fabio Pena chuan petin Aizawl goalkeeper Albino Gomes chuan tha zetin a dang. Minute 80 hnuah Aizawl FC player hlui Yuta Kinowaki chuan penalty a hlawhchhuak leh bawk. Penalty hnuhnung zawk hi Yuta chuan thun mahse DSK Shivajians atanga Lajong zawmtu Dipanda Dicka nen pettu zawk nih an inchuh nasa hle.

Thangboi chuan, "Pena kha penalty pet tur a ni a, nimahsela lakchhuah a ni. Yuta khan mawhphurna lak a tum a, sawiselna tur a awm lo. Tawnhriat kan la ngah tawk lo a, nimahsela kan naute hian rang taka hmasawn an ngai," tiin Yuta chunga lawm lohna a neih loh thu a sawi.

Lajong hian an khelmualah game 5 an khel zawn dawn a, point la hmu ve lo Lajong tan chuan insiamremna hun duhawm a ni. Thangboi chuan hemi chungchang hi sawiin, "Chak kan mamawh, chak lo thei kan ni tawh lo. Kan mualah game 5 kan khel zawn dawn a, insiamthatna atan chuan duhthusam a ni. Khualmualah chuan point 1 hi hlu hle mahse kan khelmualah chuan point 3 kan mamawh," tiin Shillong lama an inkhel hunah insiamthat nghal an mamawh thu a sawi.

Copyright © inkhel.com 2024. All rights reserved.