Kum 2016 April thla a chawlh puang tawh Manny Pacquiao chuan Amir Khan a hmachhawn dawn niin a lang.

Manny Pacquiao hian nikum khan boxing a chawlhsan thu a puang a, nimahsela nikum November thla vek khan rawn let lehin Jessie Vargas chu a rawn tukzal lehnghal a, tunah kum 38 mi nitawh mahse inhnek hmachhawn leh turin a inpuahchah mek niin report thenkhat chuan a tarlang.

Six-weight world-a champion tawh Pacquaio chuan a Twitter kaltlangin, "Tunah hian ka team-te nen hma kan la mek a, Amir Khan nen a inhnek turin inbiakna kan nei mek. Thuchiang taka sawi tur a la awm rih lova, nimahsela hun reilote chhungin engkim tihchian a nih vat ang, "tiin a sawi.

Amir Khan hian Mayweather pawh a lo cho tawh a, nimahsela American boxer Mayweather hian a chawlh thu a puan tak avangin an inhnek talo. Tunah hian Pacquaio nen inhnek turin inremna leh tihtur tul awmte buaipui mek a ni a, an inhnek a nih chuan khawvel mipui boxing ngainatuten an hlut hle in a rinawm.

Tunah hian mipui vote laknaah chuan Amir Khan-a chan a chhe hret a, a chak zawk ringtu hi 48% niin Manny Pacquaio hian 52% vote a nei ve bawk.

An kum a inthlau hle a, Amir Khan hian a vanglai a hmang mek a, Kum 30 mi chauh a la nih laiin Manny Pacquaio erawh kum 38 a ni tawh. Tunlai a boxer lar pahnih kum inthlauhna hi kum 8 zet a ni a, British boxer Amir Khan-a thazat lai tak ni mahse Manny Pacquaio-a'n a tawnhriat a chhawr thei viau bawk ang.