British boxer Amir Khan chuan April ni 21-a a hmachhawn tur Phil Lo Greco chu thuthar lakhawmtute an kawmnaah tuiin a theh.

Boxer pahnihte hi Thawhlehni khan thuthar lakhawmtute nen inkawmin Lo Greco hian Khan-a mimal nun a sawichhuak a, Khan hian ngawihsan mai lovin no (cup)-a tui awm laiin Canadian boxer hi a theh.

Kum 31 mi Khan hian nikum August thla khan a nupui Faryal Makhdoom a țhen a, Faryal hi amah ang bawka boxer ni ve tho Anthony Joshua nen inkawpah a puhzui bawk.

Olympic silver medal dawng tawh Khan hi kum 2016 May thla khan Saul 'Canelo' Alvarez chuan knockout-in WBC middleweight kawnghren a hnekchhuak zo lo va, he thil thleng hi Lo Greco hian beihnan a hmang bawk.

Kum 33 mi Lo Greco chuan, "Canelo i hnehloh hnu khan thil hloh zawng hlirin i khawsa a, i chhungkua i nupui i chan a, chumi hnuah Twitter hmangin heavyweight champion (Anthony Joshua) i bei leh bawk. I chungah hian engnge thil dik lo awm a țhianpa?" tiin a sawi a Khan-a'n tuar thei lovin tui hian a theh.

An buai chhung hi rei lo mahse boruak erawh an siam hman viau tho a, security lamin an țhelh hnuah boxing promoter Eddie Hearn chuan Lo Greco hnenah hian ngaihdam dil tura tiin boruak liantham erawh a chhuakzui lo.

Khan hian professional boxing a luhchilh hnuah mi 35 hmachhawn tawhin mi 31 a hneh tawh a, Lo Greco pawh hian professional huangchhungah mi 31 hmachhawn tawhin mi 28 a hneh ve tawh bawk a ni.